أكيد أنت فى السودان !! ---- منقول [الأرشيف]

مشاهدة النسخة كاملة : أكيد أنت فى السودان !! ---- منقول

مونتى

10-15-2007, 03:30 PM

أكيد أنت فى السودان !!

* لو بحثت عن خط (عبورمشاة) أو (أمامك مدرسة) أو(منحنى) فى كل (العاصمة) ولم تجده تبقى أكيد انت فى السودان..

* لو انت فى بلد فيهو سنة سابعة وسنة تامنة ابتدائى.. تبقى انت أكيد فى السودان..

* لو طالعتك إعلانات شركات (مسئول) كبير وهو ما زال (فى الخدمة).. تبقى انت أكيد فى السودان..

* لو (لبد) ليك شرطى (مرور) فى نهاية شارع (إتجاه واحد) وخلاك لمن دخلت وجاك بى (دفتر إيصالاتو).. تبقى انت أكيد فى السودان..

* لو لقيت فى بلد ما فيهو (معينات البحث العلمى) وكل يوم الجامعات تناقش (خمسين) رسالة دكتوراة و(ميتين) رسالة (ماجستير).. تبقى انت أكيد فى السودان..

* لو انت فى بلد وزارة الصحة فيهو قالت (الدواء) ده (فاسد) أحظروهو.. وبعد شوية قالت (ما فاسد) خلوهو.. وبعد شويتين (فاسد) أمنعوهو.. تبقى انت أكيد فى السودان..

* لو لقيت فى بلد (الصحف) بتتقفل بى (مادة) فى القانون (معمولة) للمطاعم.. تبقى انت أكيد فى السودان..

* لما تلاقى الترزى كاتب على باب المحل بتاعو (وفصلنا كل شئ تفصيلا).. تبقى انت أكيد فى السودان..

* لما تتعمل عملة جديدة وتكون قابلة (للتزوير).. تبقى انت أكيد فى السودان..

* لما تدخل (مكان) و تخلص و تيجى تركب عربيتك تلاقى (المساحات) مرفوعة عشان تعرف على طول انو فى واحد مسحها ليك وح ياخد منك ألف جنيه..

* لو (إتزنقت) وما لقيت (مراحيض عامة) ... تبقى انت أكيد فى السودان ..

* لو قرأت الصحف فى 1987 وفى 2016 عن (إنتهاء قطوعات) الكهرباء ولقيت نفس الكلام فى صيف 2030 .. تبقى انت أكيد فى السودان..

* لو بحثت فى كل البلد عن مواطن عضو فى (الحزب الحاكم) وما لقيت.. تبقى انت أكيد فى السودان..

* لو أهم (كبرى) فى عاصمة البلد صيانتو عاوزه ليها (سنتين).. تبقى انت أكيد فى السودان..

* لو لقيت إنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها (شركات إنشائية)... تبقى انت أكيد فى السودان..

* لو لقيت طالب بيقرأ (طب) ونسبتو 59% .... تبقى انت أكيد فى السودان..

* لو عاوز تفتح (بلاغ) وقالو ليك أدفع رسوم .... تبقى انت أكيد فى السودان..

* لو إتقدمت لى وظيفة وعندك (امتياز) وقام عينو زميلك العندو (مقبول) طبعا تبقى إنت أكيد فى السودان..

* لو عيادات (الدجل والشعوذة) فاتحة تستقبل (الزبائن) على عينك يا تاجر.. تبقى انت أكيد فى السودان..

* لو دخلت (الوزارة) وانت مؤجر فى (زقلونا) وطلعت وعندك عمارتين فى (قاردن سيتى).. تبقى انت أكيد فى السودان..

* لو اشتغلت فى الخدمة المدنية 30 سنة وأدوك معاش شهرى يساوى 6 كيلو لحمة... تبقى انت أكيد فى السودان..

* لو توقفت (الحركة) اثناء ساعات (الذروة) وإكتشفت أن السبب (كشة).. تبقى انت أكيد فى السودان..

* لو عدمت (التعريفة) وكمان دخلت فى (ديون) للإيفاء بنفقات (بيت بكاء) قريبك الذى توفى إلى رحمة الله.. تبقى انت أكيد فى السودان..

* لو وجدت أن (ترخيص عربتك) يساوى (ربع) قيمتها.. تبقى انت أكيد فى السودان..

* لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى انت أكيد فى السودان..

* لو (فجأة) إكتشف (المسئولون) أن (الخريف) على الأبواب.. تبقى انت أكيد فى السودان..

* لو عندك (الكلية) اليمين متعطلة وعاوزين يشيلوها ليك قامو (إستأصلوا) الشمال السليمة لأنو (الدكتور) كان ماسك الأشعة (بالمقلوب).. تبقى انت أكيد فى السودان..

* لو مكث (مرتبك) معك (تلاتة ساعات وإطناشر دقيقة) هى الفترة من لحظة إستلامه من الصراف إلى حين عودتك للمنزل.. تبقى انت أكيد فى السودان..

* لو فاز فريقك الذى تشجعه على الفريق الخصم فى مباراة الذهاب 8/صفر وخسر فى مباراة الإياب 12/صفر.. تبقى انت أكيد فى السودان..

* لو وجدت أن رؤساء (الأحزاب) هم (رؤساء) مدى الحياة.. تبقى انت أكيد فى السودان..

* لو وجدت أن نسبة الفقر تزداد بإزدياد (معدل النمو).. تبقى انت أكيد فى السودان..

كسرة :

لو قريت الحاجات الفوق دى كلها ولقيتها موجودة وما لقيت إنك فى (السودان) تبقى أكيد غلطان

هشام طمبل

10-17-2007, 10:31 AM

لو قريت الحاجات الفوق دى كلها ولقيتها موجودة وما لقيت إنك فى (السودان) تبقى أكيد غلطان
هههههههههههه تسلم يا اخوي مونتي ابدع والله

مونتى

10-17-2007, 01:22 PM

لو قريت الحاجات الفوق دى كلها ولقيتها موجودة
وما لقيت إنك فى (السودان) تبقى أكيد غلطان
هههههههههههه تسلم يا اخوي مونتي ابدع والله

ابو آيه شاكر لك مرورك من هنا
واتمنى يتغير الحال فى هذا الوطن
المغلوب على امره وان يكون لنا دورا فى التغير
عبر هذا المنتدى الرائع

روح الروح

10-21-2007, 11:51 AM

* لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى انت أكيد فى السودان

هههههههههههههه
والله دي واقعيه ميه الميه

هذا الكاتب اخي مونتي (نسيت اسمو ذكرني)
قرأت له عدة مقالات ساخره جدا
ولكن تجسد حقيقه سودانيه بحته
وتمثل الزول السوداني الساخط

يديك الف عافيه مونتي

مونتى

10-21-2007, 12:32 PM

روح الروح

10-22-2007, 09:21 AM

هههههههههه
لا السؤال ما كان جنازه جنازه;)

اتذكرتو:
الفاتح يوسف جبرا:o

وفاء

10-22-2007, 10:30 AM

شو الفضايح دي ياجماعه
حرجتونا قدام ناس داليا

روح الروح

10-22-2007, 10:47 AM

شو الفضايح دي ياجماعه
حرجتونا قدام ناس داليا

ههههههههههههههههه
خلي الطابق مستووور احسن

اوسلو

10-22-2007, 11:17 AM

[QUOTE=روح الروح;876]* لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى انت أكيد فى السودان

والله شكلك يابتي تعابنة من الانترفيوهات دي غايتو اعرفي صلاة الجنازة دي كويس يمكن يسألوك منها المرة الجاية :D

اوسلو

10-22-2007, 11:18 AM

وفعلا دا حال السودان والحمد لله

شكرا يا مونتي علي الموضوع الواقعي جدا

مونتى

10-23-2007, 11:06 PM

شو الفضايح دي ياجماعه
حرجتونا قدام ناس داليا

هههههههههههههههه
بس نعمل شنو يا دكتوره وفاء
دا الحاصل بحق وحقيقه
وبعدين مافى احراج ولا حاجه
داليا دى مننا وفينا

مونتى

10-23-2007, 11:09 PM

[QUOTE=والله شكلك يابتي تعابنة من الانترفيوهات دي غايتو اعرفي صلاة الجنازة دي كويس يمكن يسألوك منها المرة الجاية :D

اوسلو شاكر لك مرورك الجميل
وتلقاك انت من الناس السالوهم
سؤال اية الكرسى فيها كم ايه وجاوبتى بكل ثقه
انو فيها حمسه آيااااااااااااات

ولى قدااااااااااااام

اوسلو

10-27-2007, 12:36 PM

[QUOTE=اوسلو;966]

اوسلو شاكر لك مرورك الجميل
وتلقاك انت من الناس السالوهم
سؤال اية الكرسى فيها كم ايه وجاوبتى بكل ثقه
انو فيها حمسه آيااااااااااااات

ولى قدااااااااااااام

هههههههههههههههههههههههههههه

ما قدر دا لكن كان سألوني سورة الفاتحة فيها كم اية ممكن ما اعرف :D

هشام طمبل

10-31-2007, 11:25 AM

[QUOTE=مونتى;1087]

[CENTER]هههههههههههههههههههههههههههه

ما قدر دا لكن كان سألوني سورة الفاتحة فيها كم اية ممكن ما اعرف :D

ههههههههه كلام والله يا اوسلو

bossis

08-31-2010, 04:23 PM

كلام في الصميم ( مونتي )
وموضوع جميل والله
وهذه من هذي من عندي
لو حسي انا الحال عمرو ما يتغير اعرف وتاكد وخلي في بالك انك في الســـــــــــــــــودان

مبرمج المستحيل

09-10-2010, 08:25 PM

والله ابدعت عديييييييييييييل كل كلامك في محلو بس دا ما فهمتو
لو بحثت فى كل البلد عن مواطن عضو فى (الحزب الحاكم) وما لقيت.. تبقى انت أكيد فى السودان..

و الأصح لو بحثت فى كل البلد عن مواطن غير عضو فى (الحزب الحاكم) وما لقيت.. تبقى انت أكيد فى السودان..

لانو 99.999999999 % من السودانيين بطريقة أو أخرى مؤتمر وطني يعني كيزان