مونتي على الكرسي [الأرشيف] - منتديات سامي السودانية

مونتى

12-12-2007, 09:27 PM

الاسم : منتصر الامين فضل المولى احمد
الميلاد : رفاعه حسب الجواز 2/1
وفى شهادة التسنين 1/1
وفى الميلاد 13/5/1978
الحاله الاجتماعيه : اسكتو ساكت مدشدش من الشواكيش
وبالعربى العديل كده الله يفك بورتنا
المؤهل التعليمى : بكالاريوس + دبلوم عالى فى الاقتصاد من جامعة الجزيره
السكن : طفوله فى كردفان و24 سنه بقرية وديعه بريفى تمبول وحاليا ام درمان
بس للاسف بعدت من كل هذه المناطق واخترت الغربه بدولة قطر
المهنه : موظف قبل التقاعد

اها ما اتخيل لى فى شئ ناقص بعد دا
ولو فى حاجه نسيناها قولو عووووووووووووووووك

مونتى

12-12-2007, 09:30 PM

بالله يا جماعه ما اوصيكم
دايرين الود تقوم فيهو حريقه من سخونة الاسئله :p

شنو يا روح الروح مالك على
ونجهز المطافئ ولا شنو يعنى

مونتى

12-12-2007, 09:32 PM

ماتوصي حريص ياروح الروح

سجمك يامونتى أن ماخليتك تحرق من السخانه :p:p

بس أجهز الاسئله وأجي

لي عوده

عاشقة الكتمان مرحبا بك وبكل اسئلتك
بس حريق ما معانا
غير كده جيبى اسئلتك وتعالى براحتك

وانا فى رجاااااااااااااك

أم وفاء

12-12-2007, 10:26 PM

السلام عليكم
مونتي البنات ديل شكلهم ناوين عليك الله يستر
انا ما حأتقل عليك حاجات خفيفة كدا

أين مونتي من الآتي-
السياسة
الرياضة
الفن
الإجتماعيات
الحب
الأسرة
المطالعة

مونتى

12-12-2007, 11:11 PM

السلام عليكم
مونتي البنات ديل شكلهم ناوين عليك الله يستر
انا ما حأتقل عليك حاجات خفيفة كدا

ام وفاء سعيد بانك هنا يعنى ممكن نقول المطافئ وصلت
والبنات ديل اكيد ليهم يوووووووووووم
اما انت فمرورك كالنسمه دوما خفيف ويترك اثر جميل

أين مونتي من الآتي-
السياسة

من الطبيعى ان الانسان عندما يولد حرا وفجأه يجد نفسه مكبلا ومقيدا بواقع حوله
فحتما سيسعى لتغيره ،،، هكذا بدات علاقتى بالسياسه منذ الثانويه ثم الجامعه
الى ان جرت فى دمى مجرى الدم ،،،،،

أين مونتي من الآتي-
الرياضة

مارستها كهاوى فقط لكرة القدم واستمتع جدا برياضة المشى

أين مونتي من الآتي-
الفن

والله للاسف الحاجه الوحيده الما عندى بيها علاقه
يعنى لابعرف اغنى ولا ارسم ولا اكتب شعر ولانثر ولا تمثيل يعنى
فى الفن قاعد ساااااااااااااااااااااى

أين مونتي من الآتي-
الإجتماعيات

الانسان بطبعه كائن اجتماعى ولكنى رغم ذلك ليس من الذين
يتعودون على الناس بسرعه ورغم ذلك اعتز بعلاقاتى الاجتماعيه القويه
بمن هم حولى وبجميع من التيتهم من قبل ،،،،

أين مونتي من الآتي-
الحب

انا والحب خطان متقاطعان رغم اننا نلتقى فى نقطه معينه
الا ان كل مننا يمل التوقف عند تلك النقطه ليواصل كل منا فى اتجاهه

أين مونتي من الآتي :
الأسرة

الاسره هى الحضن الدافئ بالنسبة لى الذى لم ابتعد عنه من قبل
لذا هى اكتر ما افتقده الان فى غربتى ،،،،،،

أين مونتي من الآتي-
المطالعة

هوايه ملتصقه بى كظلى ،،،

روح الروح

12-12-2007, 11:55 PM

مونتى

12-13-2007, 12:05 AM

[فقط الأعضاء المسجلين والمفعلين يمكنهم رؤية الوصلات]

ممتاز جدا مونتي
اكثر ما احب هو مثل هذه الاجابات

بدايه موفقه
احيييييييييييك بشده
وانا اضمن ليك انو بالمستوى دا ما حتقوم من الكرسي خالص :D

اسئلتي لسه ما جهزت
لكن ارجا الراجيك :p

مالك على ياروح الروح
عايزانا نبدا الاعتزار عن الاجابات
:p:p:p
وتعالى سريع انا فى رجاك
والله يسترنا منك

روح الروح

12-13-2007, 02:39 PM

مونتي تحياتي
كم سؤال كدا ع الماشي تقزقز بيهم

1/ كيف كان انضمامك للمنتدى
2/ ماذا وجدت فى منتدى سامي وماذا اضاف اليك وماذا اخذ منك
3/ ما الذي يميز هذا المنتدى عن غيره من المنتديات
4/ كيف تنظر الي المنتدى وانت فى موقع قيادة
5/ ماهي الاشياء التي تنقص منتدى سامي
6/ بما انك محب للقراءة . ماهو اخر كتاب قرأته. ورينا محتواه ورأيك فيه
7/ نجحت كمشرف لمنتدى الطرائف والفرفشة هل هذا دليل على انك شخصيه هزلية ام ان أي عمل تتولى الاشراف عليه ينجح؟
8/ طلب منك منح وسام للاتي:
-افضل عضو
-افضل بوست
-افضل قسم
9/ مونتي بين هجير الغربة وحلم العودة الى الوطن
يعني بالعربي كدا متى ينتهي مشوارغربتك؟
10/ وهل حققت الهدف المرجو من هذه الغربه؟
11/ بما انك من محبي السياسه والتي اعتبرها وجع راس
لـو سلمنـاك رئاسـة جمهورية الـسـودان لـمـدة اسـبـوع مــاذا ستفـعـل؟
12/ رأيك شنو في السلام بين الشمال والجنوب؟هل انت مع او ضد؟
13/ ما رأيك في الفتاة السودانية؟وهل هناك فرق بين فتاة زمان والان؟
14/ لو خيرت ان تتزوج اجنبية غير سودانية هل انت من المؤيديين؟
15/ مونتي لاحظت عليك حماسك للزواج وفك البورة على قولتك فماهي صفات فتاة احلامك؟ امكن نلقاها ليييك :D

ما حكتر عليك كفايه كدا
اخد نفس ونرجع ليك تاااااااااااااااااااني

مونتى

12-13-2007, 05:11 PM

مونتي تحياتي
كم سؤال كدا ع الماشي تقزقز بيهم

اهلين روح الروح وبى اسئلتك
بس عليك الله هسه دى قزقزه يا روح

مونتى

12-13-2007, 05:33 PM

1/ كيف كان انضمامك للمنتدى

وصلت لهذا المنتدى بدعوى كريمه من الاخ هشام طمبل

2/ ماذا وجدت فى منتدى سامي وماذا اضاف اليك وماذا اخذ منك

بصراحه يا روح رغم حداثة منتديات سامى وانضمامى لها
الا اننى وجدت فيها الاحساس الذى يفتقده جميع من فى الغربه
احساس البلد والاهل والاسره ،،، اما اضافته فيكفى انه اعطانى روح القياده
ولا اعتقد انه اخذ منى شئ يذكر ،،،،

3/ ما الذي يميز هذا المنتدى عن غيره من المنتديات

روح الجماعه ،، علاقة الاسره ،، الاحترام المتبادل بين اعضائه
وروح الشباب الموجوده فيه ،،، وادارتو الكسلانه :p:p

اها خلينا نجر نفسا القام دا ونجيك راجعييييين

الطائر الحزين

12-13-2007, 06:13 PM

مونتـــــــــــى..

* مو غريبه من غلاك تنتحر نجمه وتطيح ! الله أكبر لا ضحكت تبرد الشمس و تسيح*

معارف اقول شنوه اختي روح الروح ماقصرت ؟؟.
بس سوال وحيد وخطير ؟؟
صح ان الانسان مالوا صاحب في الزمن دى..
وليك التعليق.
بالاضافة سوال؟.
كم صديق او صديقة وفي لكي حتى الان..
مع احترامي لكي ..
اخوك الطائر الحزين..

حي الصديق إللي له القلب يرتاح ،،، طيبه يفوح و عادة الطيب فواح

مونتى

12-13-2007, 07:09 PM

اها يا روح الروح بعد الواحد ما شال نفسو
وشرب شاى على حسابو يمكن يواصل بعد دا
:):p:p:)

4/ كيف تنظر الي المنتدى وانت فى موقع قيادة

المنتدى لسه فى بدايته ويرجى منه الكثير مستقبلا
ولكن بصراحه هذا يحتاج لمجهود جبار من ادارة ومراقبين ومشرفين
ومن جميع اعضاء المنتدى وذلك بانتهاج الموضوعيه وطرح المواضيع الهادفه
ويحتاج من الجميع اتباع مبدا مشاركة الاخرين ونقاشهم حول افكارهم ،،،

5/ ماهي الاشياء التي تنقص منتدى سامي

باختصار نحتاج وضع هدف محدد نصب اعيننا نسير نحوه بوضع خطه معينه
تمكننا من تحقيق هذا الهدف بالاضافه لشوية فاعليه كده من الاعضاء

6/ بما انك محب للقراءة . ماهو اخر كتاب قرأته. ورينا محتواه ورأيك فيه
اخر كتاب قرأته بعنوان اربعون جلده على مؤخرة رجل للكاتب امير بابكر
وهو عباره عن مجموعة رسائل موجهه لرئيس الحركه الشعبيه الراحل د . جون قرنق
تكشف بعض الملاحظات حول بعض ممارسات الحركه الشعبيه وهو من الكتب الجيده
التى تتناول ما يحاول البعض اخفاءه والقفز من فوقه وجعله دوما مسكوت عنه

7/ نجحت كمشرف لمنتدى الطرائف والفرفشة هل هذا دليل على انك شخصيه هزلية
ام ان أي عمل تتولى الاشراف عليه ينجح؟

والله ياروح الروح اتخيل لى اجابة السؤال دا بتلقيها لو قارنتى بين مونتى
مشرف منتدى الترفيه والطرائف وبين مونتى المراقب العام ،،،

ولى قدااااااااااااااااااااااااااااااااااااااام

مونتى

12-13-2007, 07:32 PM

8/ طلب منك منح وسام للاتي:
-افضل عضو
-افضل بوست
-افضل قسم

بصراحه ومن غير مجامله

افضل عضو روح الروح

افضل بوست بطاقة تعارف

افضل قسم المنتدى الاسلامى

9/ مونتي بين هجير الغربة وحلم العودة الى الوطن
يعني بالعربي كدا متى ينتهي مشوارغربتك؟

عندما تكون الغربه من اجل هدف محدد فانها حتما ستنتهى بتحقيق هذا الهدف
اما عندما تكون هروبا من واقع معين فسيبقى ميقات العوده مرتبطا بزوال ذلك الواقع
وبين كل دا ودا المغترب روحو بتكون فى السماء وجسدو فى الارض ،،
بس تعرفى يا روح الروح انا لسه شايف انو مشوار الغربه الجد جد بالنسبه لى لسه ما بدا

10/ وهل حققت الهدف المرجو من هذه الغربه؟
بالتاكيد لا والا لكنت بينكم فى السودان الان

11/ بما انك من محبي السياسه والتي اعتبرها وجع راس
لـو سلمنـاك رئاسـة جمهورية الـسـودان لـمـدة اسـبـوع مــاذا ستفـعـل؟
اسبوع بس يا روح الروح ما شويه على فعل شئ :p:p
لكن يا روح الروح دا لو حصل اكيد ساعمل على مكافحة الفساد
كاول خطوه وايقاف نزيف الدم فى البلاد والقضاء على البطاله وتقليل الصرف الحكومى
ومجانية التعليم والعلاج وخلق جو من الحريه يحكم فيه القانون بين الناس

12/ رأيك شنو في السلام بين الشمال والجنوب؟هل انت مع او ضد؟
رغم هشاشته باعتباره سلام فوقى ولم يؤسس لسلام اجتماعى حقيقى
الا اننى معه ولو من باب انه اوقف حرب امتدت 22 سنه حصدت ارواح ملايين الابرياء
واقعدت البقيه من ابناء الشعب عن اللحاق بركب التطور والنهوض لمصاف الامم

اه اه اه اه اه اه اه كباية عصير لله يا جمااااااااعه حلقنا نشف :mad:

مونتى

12-13-2007, 07:58 PM

13/ ما رأيك في الفتاة السودانية؟وهل هناك فرق بين فتاة زمان والان؟
الفتاه السودانيه هى اكثر المظاليم لانها دائما موجوده بين سندان القيود الاجتماعيه
ومطرقة القوانين الوضعيه ورغم ذلك تتفوق على وصيفاتها فى بعض الدول من حيث
المستوى التعليمى والثقافى واقتحامها للحياه العمليه ،،،
اما بالنسبه للجزء الثانى من السؤال يا روح الروح
فالاجابه عليه صعبه لاننى ود الان وليس زمان :D:D نحن صغار

14/ لو خيرت ان تتزوج اجنبية غير سودانية هل انت من المؤيديين؟

اذا كانت اجنبيه بفهم الجنسيه الغير سودانيه مع وجود عادات وتقاليد
تشبه عادات وتقاليد السودان فى ظل تصعيب الزواج من السودانيات فما المانع منه
ولكن صعوبة خيار الاستقرار النهائى بالسودان او بدولة الزوجه الاجنبيه
يرجح دوما كفة تفضيل الزواج من الفتاه السودااااااانيه

15/ مونتي لاحظت عليك حماسك للزواج وفك البورة على قولتك
فماهي صفات فتاة احلامك؟ امكن نلقاها ليييك :D

هههههههه فى زول عايز يفك البوره بتشرط يا روح الروح :):p
لكن اتخيل لى المال والجمال والدين والحسب والنسب هى الصفات المطلوبه
حسب الحديث النبوى ويا حبذا لو كانت متعلمه وتحب العمل ،،،
غايتو لو بعد دا كلو ما لقيتيها لى شيلى شيلتك معاى يا روح الروح :D

ما حكتر عليك كفايه كدا
اخد نفس ونرجع ليك تاااااااااااااااااااني

فيك الخير يا روح الروح ما لسه بدرى
لانو من اخد النفس ما خليت ليكم اوكسجين فى الهواء

ولى قدااااااااااااااااااااااااااااااااااااام

مونتى

12-13-2007, 08:05 PM

مونتـــــــــــى..

* مو غريبه من غلاك تنتحر نجمه وتطيح ! الله أكبر لا ضحكت تبرد الشمس و تسيح*

معارف اقول شنوه اختي روح الروح ماقصرت

الطائر الحزين مرحبا بك وبكل اسئلتك زائرا عزيزا للكرسى الساخن

مونتى

12-13-2007, 08:13 PM

بس سوال وحيد وخطير ؟؟
صح ان الانسان مالوا صاحب في الزمن دى..
وليك التعليق.

بالتاكيد هذا ليس صحيحا ففى حياة كل مننا صاحب عزيز وغالى
بس مرات ما بنشوف الاصحاب الحقيقين والذين هم حولنا لاننا نتطلع لصحبة
من هم ابعد منهم ،،،،،

بالاضافة سوال؟.
كم صديق او صديقة وفي لكي حتى الان..

الاصدقاء الاوفياء كثر وكذلك الصديقات ففى كل مرحله من حياتى
كنت التقى باشخاص تجمعنى بهم صداقات قويه اعتز بانها ما زالت مستمره
رغم كل شئ ودى فرصة الواحد يعتز بصداقاته التى تكونت عبر منتديات سامى

مشكور مرة اخرى الطائر الحزين وفى انتظار مرورك مرة اخرى

حمزة

12-13-2007, 10:05 PM

تحية وتقدير اخي مونتي
وكل سنة وانت طيب
اولا احيك على الصراحة وسعة الصدر في الاجابة على الاسئلة
بطاقات عيدية(1)( 2)( 3) لمن تهديها..
امنية تتمنى تحقيقها ..وحلم تعتقد انك فشلت في تحقيقة حتى الان ..
الغربة ماذا اضافة لك وماذا اخزت منك ومتى العودة الي الوطن الحبيب ان شاءاللة..
هل لديك صلة قرابة مع احد في المنتدى اذا كان نعم بطاقة عيدية اخرى..
مع خالص تحياتي حمزة

Sami

12-13-2007, 10:44 PM

الأخ العزيز مونتي نسعد دوما بوجودك معنا في هذا المنتدى و في هذا الكرسي الذي يزداد مع مرور الوقت سخونة:)

أود أن أوجه إليك بعض الأسئلة السريعة و البقية تأتي لاحقا:

1/ ماذا تعني كلمة (مونتي) ؟ هل هي دلع أم لقب أم ماذا؟؟:p
2/ ما هي قبيلتك؟
3/ فنان تستمع له؟
4/ رياضتك المفضلة؟
5/ إذا كنت من محبي كرة القدم فما هو فريقك المفضل محلياً، و خارجياً؟

6/ هل تفضل الزواج من سودانية أم أجنبية ؟ و لماذا؟؟
7/ هل للغربة تأثير على مونتي و ما سر إختيارك ل دولة قطر؟ و متى سنرى مونتي بين أهلنا و أحبابنا و وطننا؟

عاشقة الكتمان

12-13-2007, 11:37 PM

أول حاجه شرفت الكرسي ياغالي.
وتاني حاجه أنا مابطول عليك بإذن الله تعالى
يعني سؤالين تلاته وبس.
1- ماهي أمنياتك التي تتمنى أن تتحقق عاجلا؟
2-وماهي أمنياتك في المستقبل البعيد؟
3-مالذي تكرهه في نفسك؟ ومالذي تعشقه فيها؟
4- مارأيك في الزواج المبكر؟ولماذا؟
5- كيف تصف علاقتك بأهلك؟ أصدقائك؟ ربك؟
6- مالذي تسعى إليه من دخولك المنتديات؟
7- صف لنا نفسك بشكل مفصل؟ قدر إستطاعتك.
8- مالذي يثير غضبك ؟ ومالذي يدخل السرور لنفسك؟
9-صف لنا نفسك بالمدرسه؟ بالتفصيل إن أمكن ..
مع ذكر موقف طريف صادفك فيها.
10-مالذي يعنيه لك كلا من .. المال .. الصداقه .. الزواج ... المستقبل.؟
11- ماتقول واصفا كلا من .. سامي....هشام طمبل ....والطائر الحزين ... 12- ماتقول واصفا كلا من ..روح الروح .. وريماز.. والحنونه وعاشقة الكتمان ...واوسلو ... وأم وفاء
13-مالذي تعشقه في المرأة ؟ ومالذي تكرهه فيها؟
14-من أحب الناس إليك؟
15- ماهي الكلمات التي تحب أن تبلغها لمن تحب وتهوى؟
أي للفتاة التي سلبت قلبك وعقلك؟؟

والله يامونتى المفروض مااخوش عشان امتحاناتي لكين طبعا لازم ماافوت علي

ولي عوده أن شاء الله

روح الروح

12-14-2007, 12:49 AM

خخخخخخخخخخخ
والله يا مونتي الجماعه ما قصروا معاك
ردموك اسئلة تقيله
ربنا يعينك
انا عفيتك الليله لكن ليك يوم
ارجا الراجيك

الحنـــــــــــونه

12-14-2007, 01:11 AM

:) الله حيو مونتى :)

اولا كل عام وأنت بخير

احلى يوم فى حياتك؟

احلى شخص فى حياتك؟

ماهو الشيء الذي يؤثر تأثيراً عميقا في نفسك ؟؟؟

سؤال لا تحب ان يسالك احد به ؟

شنو بيعني ليك:
البحر:
الليل:
الحياة:

- حكمة تؤمن بها جدا؟؟

وسورى اذا كترته فى الاسئله:):)

مونتى

12-14-2007, 09:38 PM

تحية وتقدير اخي مونتي
وكل سنة وانت طيب

ميزو سعيد بوجودك هنا وكل عام وانت بخير
وجايييييييك برواقه لاسئلتك

تحياتى واحتراماتى

مونتى

12-14-2007, 10:05 PM

بطاقات عيدية(1)( 2)( 3) لمن تهديها..

البطاقه الاولى لامى الحبيبه والتى لاول مره فى حياتى
ابتعد عنها اربعه اعياد متتاليه متمنيا ان يعيد الله عليها هذه الايام
وهى تقوم بمناسك حج البيت الحرام ،،،،،

البطاقه الثانيه لكل الاطفال المشردين فى السودان والذين لم يجدو حظهم
من التعليم والاهتمام والرعايه الاجتماعيه التى تمكنهم من الحياه الكريمه

البطاقه الثالثه اهديها لكل اعضاء منتديات سامى واقول لهم كل عام وانتو بخير
متمنيا ان ياتى العام القادم ويجدنا المنتدى رقم واحد فى خارطتة المنتدى

امنية تتمنى تحقيقها ..وحلم تعتقد انك فشلت في تحقيقة حتى الان ..

الامانى والاحلام كثيره بالتاكيد يا ميزو والتى ادعو الله ان يحققها لى
ولكن اكثر امنيه اتمنى ان تتحق هى زيارة بيت الله الحرام ،،،
اما الحلم الذى فشلت فى تحقيقه حتى الان هو نيل درجة الماجستير فى الاقتصاد
والاستقرار فى حياتى العمليه ،،،،،،

الغربة ماذا اضافة لك وماذا اخزت منك ومتى العودة الي الوطن الحبيب ان شاءاللة..

اولا اتمنى ان يرد الله غربة الجميع حتى يرتاحوا من نار الغربه
تلك الغربه التى اخذت منى زكرياتى واصدقائى وحرمتنى اسرتى واهلى
واخذتنى من احضان وطنى الذى كنت احلم بان يكون لى دور فى تغييره للافضل
ولكنها اضافت لى فن التعامل مع الاخرين من جميع انحاء العالم والتعرف
على عادات وتقاليد شعوب اخرى عن قرب ،،،،

هل لديك صلة قرابة مع احد في المنتدى اذا كان نعم بطاقة عيدية اخرى..

دخلت هذا المنتدى وليس هنالك من تجمعنى به صلة قرابه ولكنى الان اعتقد
ان كل اعضاء منتديات سامى هم اهلى واقاربى ،،،
وبما انك اعطيتنى بطاقه اضافيه فاهديها للغاليات آيه ، عاشقة الكتمان وريماز

مونتى

12-14-2007, 10:07 PM

مع خالص تحياتي حمزة

اشكرك مره اخرى يا ميزو على مرورك متمنيا ان اكون قد وفقت
فى الرد عليك اخى ،، وخلينا نشوفك هنا تانى

ولى قداااااااااااااااااااااااااااام

مونتى

12-14-2007, 10:10 PM

الأخ العزيز مونتي نسعد دوما بوجودك معنا في هذا المنتدى و في هذا الكرسي الذي يزداد مع مرور الوقت سخونة:)

أود أن أوجه إليك بعض الأسئلة السريعة و البقية تأتي لاحقا

مديرنا زاتو شرفنى بحضوره والله دى حاجه تفرح
وتستحق ان اشكرك عليها يا غالى ومرحبا بك وبكل استفساراتك
متمنى ان يوفقنى الله فى الرد على الجميع

ولى قداااااااااااااااااااااااااااام

مونتى

12-14-2007, 10:33 PM

1/ ماذا تعني كلمة (مونتي) ؟ هل هي دلع أم لقب أم ماذا؟؟:p

مونتى دا يمكن بدا كدلع من انسان عزيز وغالى
ليصبح بمثابة لقب يرتبط بى كاسمى ينادينى به القريبين منى دوما

2/ ما هي قبيلتك؟
:):) انتمى الى مجموعة الجعليين الموسياب مدينة شندى

3/ فنان تستمع له؟
ومن لا يعشق الموسيقار محمد الامين ويستمع له

4/ رياضتك المفضلة؟

احب كرة القدم جدا

5/ إذا كنت من محبي كرة القدم فما هو فريقك المفضل محلياً، و خارجياً؟
نحن فى المريخ اخوه نعشق النجم ونهوى :p
وبما انى جاى من مباراة المريخ والهلال فى نهائى كاس السودان
اهنئ كل مريخاب المنتدى بالفوز ونيل بطولة كاس السودان وهاردلك للهلالاب
اما خارجيا فانا من عشقاق ريال مدريد الاسبانى وانتر ميلان الايطالى

6/ هل تفضل الزواج من سودانية أم أجنبية ؟ و لماذا؟؟
7/ هل للغربة تأثير على مونتي و ما سر إختيارك ل دولة قطر؟ و متى سنرى مونتي بين أهلنا و أحبابنا و وطننا؟

اعتقد ان هذين السؤالين قد اجبت عليهما سابقا وبالنسبه لاختيار قطر
فوجود شقيقى الاكبر هنا كان له دور كبير للاغتراب بدولة قطر

ختاما اتمنى ان اكون قد اجبت على كل تساؤلاتك يا سامى

ولى قدااااااااااااااااااااااااااااام

مونتى

12-14-2007, 10:42 PM

أول حاجه شرفت الكرسي ياغالي.
وتاني حاجه أنا مابطول عليك بإذن الله تعالى
يعني سؤالين تلاته وبس.

اهلين بيك عاشقة الكتمان الكرسى الساخن نور وبدا يبرد بوجودك
وخدى راحتك بس لكن هسه ديل سؤالين تلاته يا عاشقه :p:D

اها انا ماشى على السؤالين تلاته حقنك ديل :)

ولى قداااااااااااااااااام

مونتى

12-15-2007, 09:08 AM

الاخت عاشقة الكتمان اسف على التاخير ،،،،،

1- ماهي أمنياتك التي تتمنى أن تتحقق عاجلا؟
2-وماهي أمنياتك في المستقبل البعيد؟

كما ذكرت سابقا كثيرة هى الامانى ولكن من الامانى التى اتمنى ان تتحقق عاجلا
الاستقرار العملى وعلى مستوى حياتى الشخصيه وان انزل السودان اجازه قريب
اما فى المستقبل البعيد فاتمنى اكمال الماجستير وحمل رسالة الدكتوراه فى الاقتصاد
والتخصص فى بعض اللغات على المستوى العلمى والزواج وتكوين اسره سعيده
وان يرزقنى الله ببنت الحلال على مستوى الحياه الخاصه والعوده النهائيه لارض الوطن
على المستوى العملى وبناء الدوله المدنيه الديمقراطيه الموحده على المستوى السياسى
و ... و .... الخ ،،،،،،،،

3-مالذي تكرهه في نفسك؟ ومالذي تعشقه فيها؟
ههههههه سوال بالجد صعب بس بصراحه كده بكره فى نفسى الانفعال احيانا
مع انو مافى زول ما بتعجبو نفسو لكن ورغم الانفعال فاعشق فى نفسى الهدوء :p

4- مارأيك في الزواج المبكر؟ولماذا؟

الزواج المبكر وصى به النبى (ص) لفوائده واعتقد ان من اجابياته
عدم وجود فارق عمر كبير بين الزوجين مما يسهل من عمليه التوافق الفكرى
بعكس الزواج فى سن متاخره عادة يكون فيه فارق العمر بين الزوجين 10 سنوات على الاقل
ولكن خطورة الزواج المبكر تاتى فى قلة تجربة الزوجين لتحمل المسئوليه الزوجيه
مما يهدد بفشله فى اغلب الاحيان ،،،،،،

5- كيف تصف علاقتك بأهلك؟ أصدقائك؟ ربك؟

الحمد لله علاقتى باهلى على احسن مايكون اكن لهم كل التقدير
واجد منهم كل الحب والاحترام وكذا الحال باصدقائى والذى اعتبرهم اخوتى
بحق وحقيقه اما علاقتى بربى فاتمنى ان اكون دوما فى عون ربى ليكون فى عونى

6- مالذي تسعى إليه من دخولك المنتديات؟
كل منا صاحب رساله يجب ان يوصلها للاخرين عبر التواصل معهم
وفى هذا العصر اصبح الانترنت وسيلة التواصل الاوسع انتشارا وسرعة
خاصة فى المنتديات التى تمكنك من تبادل افكارك مع الاخرين وكذلك تنمى فيك
الثقه بالنفس فى طرح ارائك ونقاشها مع الاخرين هذا ما اتمنى ان احققه من خلال
مشاركتى فى بعض المنتديات ،،،،

ولى قداااااااااااااااااااااااااااااااااااااام

مونتى

12-15-2007, 09:29 AM

7- صف لنا نفسك بشكل مفصل؟ قدر إستطاعتك.

هذا امر صعب للغايه اختى عاشقة الكتمان لانو الواحد عادة مايصفه الاخرون ولكنه لايصف نفسه
ولكن ان كان لابد من وصف فهو ( طويل ،، تخين ،، اصلع :):p ) كده كيييييييييف

8- مالذي يثير غضبك ؟ ومالذي يدخل السرور لنفسك؟
على المستوى العام اننا ما زلنا كسودانيين من دول العالم الثالث رغم اننا اول دوله افريقيه
تنال استقلالها جنوب الصحراء ،، اما على المستوى العام فاى اهانه او اساءه توجه لى تغضبنى
ولكن اكثر ما يدخل السرور فى نفسى هو سماع صوت الوالده وهى تدعو الله لى ،،،،

9-صف لنا نفسك بالمدرسه؟ بالتفصيل إن أمكن ..
مع ذكر موقف طريف صادفك فيها.

اذكر حتى الان اننى كنت طالب مهمل جدا رغم تفوقى على اولاد دفعتى فى الغالب
فيصل حد اهمالى اننى صبيحة كل يوم لم اكن اتذكر اين وضعت شنطة كتبى ودفاترى بالامس
لدرجة انه عند ظهور نتيجة الشهاده الابتدائيه وشاع ان الكل ناجحين عدا طالب واحد
كانت امى تعتقد اننى هذا الشخص لتفاجا باننى الخامس على مستوى المدرسه
اما اطرف المواقف فكانت برفاعه الثانويه عندما كنت امينا للعلاقات الخارجيه لاتحاد الطلاب
وكنت اقوم مع رئيس الاتحاد باخذ اوزان خبز طلاب الداخليه للتاكد من انه الوزن الصحيح
مما يعرضنا للحضور متاخرين عن المدرسه صباحا ونجد الباب مغلق فنقفز من فوق السور
مما كان يثير غضب صول المدرسه حتى اضطر ذات مره لتهديدنا بهدم السور ليرى
من اين سنقفز المره القادمه هههههههههههه والله ايام بالجد ،،،،،،،

بمشى وبجيكم راجع تانى يا عاشقة الكتمان ،،،،،،،،

مونتى

12-15-2007, 10:03 AM

10-مالذي يعنيه لك كلا من .. المال .. الصداقه .. الزواج ... المستقبل.؟
المال : زينه ولكنها زائله ،،
الصداقه : شجرة خضراء وآرفة الظلآل ،،،
الزواج : استقرار نفسى ،،،،
المستقبل : امل نحيا به ونعيش عليه

11- ماتقول واصفا كلا من .. سامي....هشام طمبل ....والطائر الحزين ...
12- ماتقول واصفا كلا من ..روح الروح .. وريماز.. والحنونه وعاشقة الكتمان ...واوسلو ... وأم وفاء

سامى : انسان يجبرك على احترامه لما يحمله من الادب والوقار ،،
هشام طمبل : حقيقه هو الاخ الاكبر لنا هنا ،،،
الطائر الحزين : شلال من الرومانسيه ،،،،،،،،،،،،
روح الروح : روح المنتدى وقلبه النابض ،،،
ريماز : رقم لا يمكن تجاوزه ،،،
الحنونه : بحر من الذوق ،،،،،،،،،،،،،،،،،،
عاشقة الكتمان : درة المنتدى وفاكهته ومستقبله المشرق ،،،
اوسلو : عقل كبير وفكر راجح ،،،
ام وفاء : ام لنا جميعا ونموزج للمراه العصاميه تجبرك على حبها واحترامها ،،،

13-مالذي تعشقه في المرأة ؟ ومالذي تكرهه فيها؟

اعشق فى المرأه ثقتها بنفسها واعتزازها بروحها وايمانها بمكانتها ودورها فى مجتمعها
واكره فيها الاستسلام والخضوع للقيود التى تكبل بها ،،،،،،

مونتى

12-15-2007, 10:13 AM

14-من أحب الناس إليك؟

امى اطال الله عمرها وادام عليها نعمة الصحه والعافيه

15- ماهي الكلمات التي تحب أن تبلغها لمن تحب وتهوى؟
أي للفتاة التي سلبت قلبك وعقلك؟؟
:):):):)

ربنا يسعدك ويهنيك ويخلى ليك عيالك اتمنى ان يصلها دعائى هذا وان يستجيبه الله عز وجل

والله يامونتى المفروض مااخوش عشان امتحاناتي لكين طبعا لازم ماافوت علي

ولي عوده أن شاء الله

عاشقة الكتمان وجودك كان لابد منه والحمد لله انك اديتينا من زمنك شويه
واتمنى من الله ان يوفقك فى دراستك وفى مشوارك التعليمى وان تتحقق كل امانيك
ونحن فى انتظار عودتك مرة اخرى عاشقه ،،،،

ولى قدااااااااااااااااااااااااااااااااام

اوسلو

12-15-2007, 11:10 AM

اول مرة اشوف البوست دا :mad:

لكن الحمد لله لحقته قبل ما يقفل بس لقيت الجماعة ماقصروا ماخليتو لي حاجة عشان اسأل فيها

اولا اهلا يامونتي بوجودك علي هذا الكرسي وانا شايفة الكرسي ولع نااااااااااار

وانت يامونتي ماشاء الله عليك خطير عديل كدا في الاجابات

يلة نبدأ

1- لمن تفشي باسرارك؟؟

2- هل مررت بتجربة عاطفية :D؟؟؟ وما الذي استفدته من هذه التجربة؟؟

3- موقف محرج مررت به؟؟؟

ولي عودة بعد قليل ;)

مونتى

12-15-2007, 01:12 PM

خخخخخخخخخخخ
والله يا مونتي الجماعه ما قصروا معاك
ردموك اسئلة تقيله
ربنا يعينك
انا عفيتك الليله لكن ليك يوم
ارجا الراجيك

تشيلى وتحرشى فى الجماعه يا روح الروح وعايزاهم يرحمونى
والراجينى الله يقدرنى عليهو ويسترنى منو ،،،

:):):):)

مونتى

12-15-2007, 01:14 PM

:) الله حيو مونتى :)

اولا كل عام وأنت بخير

اهليييييييييييييين الحنونه الله يحيك يا غفيرنا
وكل سنه وانت طيبه وربنا يحقق كل الامانى الطيبه

وآسف على التاخير

مونتى

12-15-2007, 01:39 PM

احلى يوم فى حياتك؟

اكيد يوم تخريجى يا الحنونه خاصة انه كان وسط زغاريد الوالده
والاهل والاصدقاء واسرهم وهو اليوم الذى قطفت فيه ثمره 16 سنه تعليم
لذلك اعتبره احلى يوم فى حياتى ،،،،،،،

احلى شخص فى حياتك؟

وهل هنالك شخص احلى من الام فى حياة الانسان ؟؟؟؟

ماهو الشيء الذي يؤثر تأثيراً عميقا في نفسك ؟؟؟

اخبار الحروب والصراعات فى السودان والتمييز الثقافى الذى تمارسه
حكوماتنا بين المواطنين ولكن اكثر ما يؤثر فى نفسى رؤية طفل او امراه مشرده فى الشارع

سؤال لا تحب ان يسالك احد به ؟

اى سؤال يتجاوز العام للخصوصيات لا احب ان يسالنى له احد

شنو بيعني ليك:
البحر:
الليل:
الحياة:/COLOR]

البحر : شاشه يعرض عليها شريط ذكرياتك
الليل : الاطمئنان
الحياه : طرق متشابكه عليك ان تختار الآمن منها

[COLOR="Navy"]
- حكمة تؤمن بها جدا؟؟

الحسنه فى المنعول زى الشرا فى القندول

سورى اذا كترته فى الاسئله:):)

العفو يا الحنونه كترتى شنو انت ما شفتى الناس البتقول سؤالين تلاته بس
وتلقاها ثلاثه زائد عشرين :):)

وختاما يا الحنونه سعد بجلوسى امامك على الكرسى الساخن

الحنـــــــــــونه

12-16-2007, 12:53 AM

مشكور مونتى على الردود
الحسنه فى المنعول زى الشرا فى القندول
مافاهمه الحكمه دى حكمه سودانيه

مونتى

12-16-2007, 06:43 PM

اول مرة اشوف البوست دا :mad:

لكن الحمد لله لحقته قبل ما يقفل بس لقيت الجماعة ماقصروا ماخليتو لي حاجة عشان اسأل فيها

اولا اهلا يامونتي بوجودك علي هذا الكرسي وانا شايفة الكرسي ولع نااااااااااار

وانت يامونتي ماشاء الله عليك خطير عديل كدا في الاجابات

يلة نبدأ

اوسلووو اهلين بيك فى اى وقت وزى ما قلتى الجماعه ما قصروا نهااااااائى
وكلهم قالو دى المناظر بس يعنى كويس انو الغريق لسه ما فاتك واهو حصلتى
واعتزر منك اوسلو ومن الجميع على التاخر فى الردود لظروف العمل الضاغط
هذه الايام مع اقتراب عطلة عيد الاضحى المبارك اعاده الله عليك وعلى الجميع
وانتم تنعمون بكل خير وعاااااااااااااااااااافيه وكل سنه وانتو طيبين مقدما ،،،

ولى قداااااااااااااااااااااااااااااام

مونتى

12-16-2007, 07:48 PM

1- لمن تفشي باسرارك؟؟

اى شئ يا اوسلو نبوح به او نفشيه بالتاكيد تنتفى عنه صفة الاسرار وبصراحه كده
انا لست من الذين يفشون اسرارهم ،،، لكن طبعا هنالك بعض الامور
التى لا تصل مرحلة الاسرار لكن الانسان لا يحبز ان تشاع وان تظل فى نطاق ضيق جدا
فمثل هذه الامور لا اجد اعز من اصدقائى مجدى حنكوش حماده ومحسن كابو
اطال الله عمرهم وادام المودة بيننا دوما ،،،،

2- هل مررت بتجربة عاطفية :D؟؟؟ وما الذي استفدته من هذه التجربة؟؟

هسه فى داعى للعبه الخشنه دى يا اوسلو يعنى الواحد يا ينسحب
من السؤال دا يا يفت روحو ويخرب سوقوا ههههههههه :p:p
لكن اكيد لكل منا تجاربه العاطفيه التى مر بها فى كل مرحله من حياته
ولكن اعمق تجربه عاطفيه امتدت لفترة سبعه سنوات تقريبا
وبالتاكيد استفدت منها كثيرا وتعلمت منها ما ينقص مثل هذه التجارب وما تحتاجه لتثمر
كما خرجت منها بزخيره جيده بالتاكيد ستعينى فى مشوار حياتى
اذا ما قادنى القدر لخوض تجربه عاطفيه اخرى ،،،،،،،،،

3- موقف محرج مررت به؟؟؟

ولي عودة بعد قليل ;)

المواقف تتفاوت فى درجة احراجها بالتاكيد لكن اكثر موقف احسست فيه بالحرج
اتاخرت مره من المرات على الجكس فى مكان اصحابى كانو عارفين انى بمشى ليهو
فادوها التلفون اتصلت وردت عليها بت كانت موجوده وقالت ليها عايزه مونتى وناولونى التلفون
واول ما سمعت صوت صوتها فى الجهه الاخرى احسست بحرج بااااااالغ ،،،،،

وفى انتظار عودتك يا اوسلو لى قداااااااااااااااااااام دوما

remaz

12-16-2007, 08:11 PM

مونتي مية اهلا وسهلا بيك في الكرسي الساخن الكرسي نور الناس ماشاءاللة
ما خلت شي يلى ديل بعض الاسئلة خزهم اتسلي بيهم

بماذا تغضي وقت فراغك؟؟؟
ماهو برجك ؟؟؟؟

كلمة حب لمن تهديها ؟؟؟؟

كل الناس بتمر بي تجارب هل مونتي مرة بي تجربة وحابي يعيدهاااا؟؟؟

ماهو شعارك ياتري شعار رومانسية او حب او امن وسلام ؟؟؟؟

ياتري مونتي ديمقراطي ولا ديكتاتوري ؟؟؟

هل انت مع الديكتاتورية ولا ضد؟؟؟

كيف تنظر للمجتمع الاوروبي هل في نظرة اختلاف بين المجتمعين الاوروبي والعربي ؟؟؟؟؟

ماذاء تفعل عندما تكون غاضب ؟؟؟

انشاءاللة ما اكون كترت عليك بي الاسئلة لي عودة انشاءاللة

مونتى

12-18-2007, 12:34 AM

مونتي مية اهلا وسهلا بيك في الكرسي الساخن الكرسي نور الناس ماشاءاللة
ما خلت شي يلى ديل بعض الاسئلة خزهم اتسلي بيهم

اهلا وسهلا بك ريماز منوره الكرسى والله وعقبال جلوسك هنا
واسالتك على العين والراس يا ريماز

ولى قدااااااااااااااااااااااااام

مونتى

12-18-2007, 01:32 AM

بماذا تغضي وقت فراغك؟؟؟

الفراغ بالتاكيد امر مزعج لذلك عادة ما احاول
ان اغضى اوقات فراغى فى القراءه وتصفح الانترنت
او زيارات للاهل والاقارب والاصدقاء وان لم يكن ذلك ممكنا
فلا يوجد غير النوم ،،،،،،،

ماهو برجك ؟؟؟؟

والله انا ما بفهم فى الابراج دى كتير يعنى عندى الدلو والثور واحد
لكن اقدر اقول انا مواليد 13 مايو ،،،،،

كلمة حب لمن تهديها ؟؟؟؟

اهديها لجميع اعضاء منتديات سامى القدامى والجدد
واقول ليهم والله بحبكم كلكم فى الله ،،،،،

كل الناس بتمر بي تجارب هل مونتي مرة بي تجربة وحابي يعيدهاااا؟؟؟

لو فى طريقه الواحد يخوض تجربة الدراسه الجامعيه من جديد
اكيد ما حا افوت فرصة اعادة هذه التجربه لاننى اعتقد ان جزء كبير
من شخصيتى صقل بشكل جيد فى تلك الفتره ،، كما انه فى هذه التجربه
تتكون شخصية الفرد المستقله واهم من ذلك ما زلت اعتقد اننى كنت فى تلك الفتره
اكثر فائدة من الان ،،،،،،

ماهو شعارك ياتري شعار رومانسية او حب او امن وسلام ؟؟؟؟

قل ما تشاء ،،،
كن ما تقول ،،،،،،،

ياتري مونتي ديمقراطي ولا ديكتاتوري ؟؟؟

ان كنت دكتاتورا لما اخترت الغربه ،،،، ولكنى ما زلت اتلمس خطى الديمقراطيه

هل انت مع الديكتاتورية ولا ضد؟؟؟

ومن منا مع الدكتاتوريه يا ريماز فانا من انصار مقولة :
(كل الوطن للناس لا خاصه لا عامه)

كيف تنظر للمجتمع الاوروبي هل في نظرة اختلاف بين المجتمعين الاوروبي والعربي ؟؟؟؟؟

اكيد هنلك اختلاف كبير بين المجتمعين اقلاها استقلالية الفرد فى المجتمع الاوربى
ورغم ذلك فالمجتمع الاوربى ليس مدينه فاضله بالتاكيد ولاالمجتمع العربى متخلف بالكامل
ولكن الاشراقات الجميله فى المجتمع العربى هى الشواذ
فى حين اننا نجد العكس فى المجتمع الاوربى

ماذاء تفعل عندما تكون غاضب ؟؟؟

يؤسفنى اننى احيانا لا استطيع فعل شئ ولكنى عادة احاول ان لا اكتم غضبى
ومن ثم ابحث عن اى شئ اهدئ به نفسى ولا اجد غير الحركه والتمشى لتخفيف الغضب

انشاءاللة ما اكون كترت عليك بي الاسئلة لي عودة انشاءاللة

العفو يا ريماز لو انت كترتى ناس ال 25 سؤال ديل
نقول عليهم شنو وبعد ده يقولو ليك بنجيك راجعين خليك قريبه
وطالما انا على الكرسى الساخن فانا تحت امركم دوما

وفى انتظار عودتك ريماز ،،،،،،،،

الحلم الجميل

12-18-2007, 04:25 AM

مونتى مـــــنور الكرسى
ماشاء الله تبارك الله عيني باردة
حامشي وبجيك صادة معاى كباية العصير تبرد عليك ..

مونتى

12-18-2007, 02:15 PM

مونتى مـــــنور الكرسى
ماشاء الله تبارك الله عيني باردة
حامشي وبجيك صادة معاى كباية العصير تبرد عليك ..

الكرسى منور بوجودك والله يا بنت اوركيد يا اصيله
ومشكوره على كباية العصير زول ساى غيرك حن على وكشكر ساى مافى

فى انتظار عودتك ،،،،،،،

روح الروح

12-20-2007, 08:34 PM

مونتى

12-21-2007, 08:44 PM

سلااااااااام يا مونتي
ازيك وازي الكرسي معاك
معليش الناس اتلخمت مع اللحمه والضبيحه
طبعا في السودان العيد زحمه ما زيكم بهناك
ربنا يرد غربتك يا رفيق

اتخيل كدا انك معانا هنا في السودان
ومع الناس الهايجه بالحمى النزفيه دي
انت من ياتو نوع:
النوع الحريص على روحو وما بضبح عشان المرض
ولا من النوع الحريص على اداء السنه العظيمه دي وتضبح وتقول ال الله كاتبو بيحصل... وتضرب الشيه دي ولا يهمك ؟؟؟؟؟؟

اهلين مرة اخرى روح الروح وربنا يرد غربة الجميع
واكيد الناس نسونى وخلونى قاعد فى الكرسى صحن شيه ساى ما جانا
هههههههههههههههههههههههههههه :lulu18::lulu18::clown:
بالنمسبه لسؤالك فربنا ما امر بالهلاك والوقايه خير من العلاج
لكن لو كان فى نسبه 10% انو الخروف يكون سليم
اكيد الشيه ما بتتفوت وياروح ما بعدك روح

روح الروح

12-21-2007, 09:22 PM

شنو يا مونتي
انا مش خليت ليك لحمه في الصاج في الراكوبه مع ميزو؟؟؟:clown:
لكن لقيتك أكاااال ونكااااار
وكمان قضيت على الشربوت ما خليت فيهو حاجه:laughing:

مونتى

12-22-2007, 01:27 AM

شنو يا مونتي
انا مش خليت ليك لحمه في الصاج في الراكوبه مع ميزو؟؟؟:clown:
لكن لقيتك أكاااال ونكااااار
وكمان قضيت على الشربوت ما خليت فيهو حاجه:laughing:

ههههههههه روح الروح ما تخلطى الاوراق
ولا عايزين تمسحونا من شية الكرسى الساخن
يعنى تشوها فى سخانة الكرسى
وتاكلوها فى الراكوبه

:lulu18::lulu18:

اوسلو

12-23-2007, 01:00 PM

كل سنة وانت طيب يامونتي والسنة الجاية زي ماعاوز ان شاء الله

كويس انك لسة في الكرسي الساخن عشان الواحد لسة عنده ليك كم سؤال كدا :dribble:

1- يوم في الذاكرة؟؟

2- اصعب لحظة مرت بك؟؟

3- رأيك في المجتمع السوداني عامة والفتاة السودانية خاصة؟؟ :kicking:

4- هل كلمة الكراهية لها مجال في حياتك؟؟

5- هل من السهل علي مونتي ان يذرف الدموع؟؟

كفاية ديل لحدي ماتجاوب عليهم راجعة تاني :0122:

مونتى

12-23-2007, 02:39 PM

كل سنة وانت طيب يامونتي والسنة الجاية زي ماعاوز ان شاء ال
كويس انك لسة في الكرسي الساخن عشان الواحد لسة عنده ليك كم سؤال كدا :dribble:
/CENTER]

وكل عام وانت بالف خير اوسو وربنا يحقق امانى الجميع
ومليون مرحبا بكل اسئلتك يا اوسلو وسعيد بعودتك
بس اعمل شنو الناس مشت تعيد وخلونى قاعد هنا لغاية متين الله اعلم

[CENTER]
1- يوم في الذاكرة؟؟

يوم تخرجى من الجامعه ،،،

2- اصعب لحظة مرت بك؟؟

كثيره هى الايام واللحظات الصعبه ولكن اصعبها كانت لحظة
مفارقة الوالد للحياة عليه رحمة الله وانتهز فرصة هذه الايام المباركه
وادعو الله ان يسكنه فسيح جناته وان يغفر له ذنبه ويرزقه الجنه

3- رأيك في المجتمع السوداني عامة والفتاة السودانية خاصة؟؟ :kicking:

المجتمع السودانى يحتاج لمساحه اكبر لقول رائ فيه
ولكن هنا اكتفى بالقول ان عوامل ونقاط التلاقى والتقارب
بين جميع افراد المجتمع السودانى باختلاف ثقافاتهم اكبر واكثر
بكثير من عوامل ونقاط الاختلاف بين افراده ولكننا فقط نحتاج
للالتفاف حول نقاط الالتقاء وترك نقاط الاختلاف جانبا ،،،
اما الفتاة السودانيه فهى المظلوم الاكبر فى المجتمع السودانى
طالما انها مازالت تعتبر اساس البلاء والابتلاء وانها شيطان
يجب ان نستعيز منه دوما عند الكثيرين فى مجتمعها ،،

مونتى

12-23-2007, 02:55 PM

4- هل كلمة الكراهية لها مجال في حياتك؟؟
بالتاكيد لا لان المسامح دوما كريم
ولا يوجد هناك ما يستدعى الكراهيه ان كان كل منا حريص
على ان تغلب عليه صفات الحب للاخرين

5- هل من السهل علي مونتي ان يذرف الدموع؟؟

لا يمكن لاى شخص ان يحبس دموعه عند التاثر باى موقف
وبينى وبينك من انا طفل امى الله يطول عمرها بتقول ليك دموعك قريبه
:laughing::a15::laughing::a15::laughing:

كفاية ديل لحدي ماتجاوب عليهم راجعة تاني :0122:

مشكوره اوسلو على هذه الاطلاله الخفيفه وفى انتظار عودتك

روح الروح

12-24-2007, 01:01 AM

كان مونتي نعم الجليس على الكرسي
ورغم سخونته وطول مدته الا انه احتوى جميع الاسئله ببراعة اجاباته الشافيه والصريحه
مونتي بشهادة من الجميع احسنت الجلوس
وكنت الماء الذي اطفا نار الكرسي وجعله رمادا

لا نقول وداعا بل الى لقاء آخر
ولكن قبل الوداع نطلب منك كلمه اخيره
كما انه لك حق اختيار جليس الكرسي بعدك
ولكن بيني وبينك حتى يتم تنبيهه ....:b18:

شاكرين تواجدك ومواظبتك الدائمه
لا عدمناك
ودمت ذخرا للمنتدى

تقبل تحياتي دووما
رووح

مونتى

12-24-2007, 01:06 PM

اخيرا ياروح الروح اتذكرتى انى لسه محروق بالكرسى

:laughing::clown::laughing::lulu18:

الاعزاء اعضاء منتديات سامى سعدت لاننى كنت بحضرتكم
اتعلم منكم استمتع باسالتكم ومشاغباتكم ،،،،
اشكر الجميع على تواجدهم معى وتوقيعهم هنا او مرورهم
وشكر خاص لكل من رشحونى ومنحونى شرف الجلوس على الكرسى
وزى ما قالت روح الروح الى لقاء اخر ولو على الكرسى مرة اخرى

وشكرا لكم جميعا لانكم علمتمونى ادب الحوار ،،،،،

ولى قدااااااااااااااااااااااااااااااااااااااام