عين على الحياة السودانية

[مهند اسيد]

بسم الله الرحمن الرحيم
عين على الحياة السودانية
هذا العنوان الذى سرقته من قناة الجزيرة ( عين على السودان) كبير على الموضوع الذى ساطرحه عليكم, فموضوعى يناقش قضية واحدة من قضايا المجتمع السودانى الكثيرة المعقدة, لكنها بلا شك قضية مهمة وحساسة وتثير كثيرا من اللقط وسط مجتمعاتنا.
فى لحظة من لحظات الملل تحديدا من المجاملات للمجتمع الذى حولى هذا الشعور وهذه اللحظة التى لو نجا منها احدنا لنجا منها احدنا , طاف بذهنى فى هذه اللحظة مقارنة ما بين اذا كنت اعيش خارج السودان فكما هو معلوم حيث توفر الزمن أو لتنظيم الزمن ,سأدع المجال هنا لمن يعيش خارج البلاد ربما أكون مخطئ - ومقارنة بين حياتى الحالية وانا داخل السودان, فمعظم وقت الشعب السودانى لا أقول ضائع فهذه تسمية مؤكد أنه يختلف ايضا معى فيها كثير من الناس , أنا نفسى لا أتفق مع نفسى فيها بعض الأحيان, فالذى يسافر الى مدينة ود مدنى من الخرطوم ويترك عمله او دراسته أو أو .... الخ , لعزاء أو لحضور فرح, يأخذ هذا المشوار الكثير من الزمن على حساب العمل او الدراسة أو أو , بالمقابل هنالك ثواب وأجر يعود عليه من هذه السفرية , ويذيد ويؤطر علاقات القربى , ويخفف مصابهم . اذا هنا ينبغى أن يدور محور النقاش, والسؤال الذى يطرح نفسه, هل المجاملات مضيعة للزمن؟
إلى أى حد تعود علينا المجاملات بالمنفعة ( طبعا دنيا وآخرة)؟
وإلى أى حد تعود علينا بالضرر؟
حتى تكون المسألة أوضح وبالبلدى كدة, أنا سخسيا اذا ضربت بى نفسى مثال مركب كرونة كلب يعنى بجرى جرى شديد ومتواصل, يكاد لا يخلو يوم من الايام ومافى حد طريح الفراش بالمنزل أو بالمشفى الا وعايز أصلوا, قريب لنا أو معرفة توفاه الله الى رحمته, فلان عرس وفلان جابوا ليهو سغير.فى حين أنى محتاج للزمن عشان ما ادرس الزمالة المحاسبية وعايز أظبط اللغة الانجليزية بتاعتى وعايز أطور نفسى فى شتى المجالات وده ما بيتأتى الا بتوفر الزمن والمجهود والمال, نهايتو والشى الما ح أختلف عليهو معاكم ومع نفسى المجاملات على حساب تطوير الذات والعكس هو الصحيح. والله أنا بكتب وما عارف أنا بالضبط عايز منكم تقولوا شنو, احتمال فاض بى وعايز اشكى ليكم. والعايز يبكى زاتو يجى يبكى مؤكد ح يلقى الصدر الحنون بلا شك, من أعضاء منتديات سامى السودانية.
الحمد لله على كل حال

[enas]

بسم الله الرحمن الرحيم

وبه نستعين



أخي العزيز لا أكذب عليك عندما قرأت

هذا البوست ابتسمت إبتسامه لها عدت

ألوان لا أدري ابتسامت إنتصار أم خجل

من نفسي أنقل لك مشاعري بكل صدق

انتصار لأنني ارى بوست لو ما كنت

سوداني يخرج للساحه مره أخرى ولكن

بتأني ورويه خطوه خطوه وخجلانه لأنك يا

أخ مهند إستطعت أن تنتقي العنوان

الأكثر تناسباً اُحييك أخي على هذا

الإختيار الموفق وأ عتزر لك عما حدث من

سؤ فهم في السابق ولان الموضوع كان

منقول لم تكن لدى الصلاحيه لتغيير

العنوان لكن في النهايه تعددت

العناوين والنتيجه واحده.........

فعلا يا مهند المجاملات في السودان فاضت

وزادت عن حدها والبزيد عن حدو بنقلب

لضدو يعني ممكن يا أخوي لو الناس مشت

لمشوار عزاء يقدموا واجب العزاء

ويرجعوا في لحظتهم وحينهم مافي داعي

للتلاته يوم لحدي الرفع يعني. ولو في عرس

ممكن يمشوا في الصاله بس ما يجوا من قبل

اسبوع ويمشوا بعد العرس بإسبوع ده

بالنسبه للسودان وانت ادرى مني بالحال

اما بالنسبه للغربه فأنا حا أحكي

ليك الحكايه دي .........لدىّ خاله في

الامارات زوجها شغلوا حساس جدا جدا

بتطلب بعد عناء العمل انو يرجع البيت

ليرتاح من جهد وعناء وممكن اى إرهاق

جسدي او ذهني يضيعوا ويضيع معاهو

ارواح ناس.. بيطلع من الصباح بيصلي

الصبح في الشارع وبرجع في المساء ليجد

هذه الزوجه المحبه للناس والحياه

والمجاملات مجهزه لسته من المشاوير

والمجاملات المهمه في كثير من الاحيان ومهمه

لانو نحن سودانيين يعني مثلا بعد كم يوم

خطوبة ايناس بتوقفوا استان باى لحدي

بعد الخطوبه بيومين اغراضه واغراض

اطفاله من السوق و ناس فلان

الفلاني عندهم بكاء فلانه عملة عمليه

جري وجري وجري ما كان من زوجها إلا

انو طلب ينتقل من دبي لِدوله أُخرى

سكلت وردحت لكن منو البسمع ليها

زوجها

طلب انو ما حد فينا يتدخل في حياتو

لانو مرهق بكل ما تحمل الكلمه من معنى

يا مستقبلوا والدوام يا المجاملات قال

لينا بالحرف الواحد كل العالم دي بتمشي

بيوتها وبترجع لدواماتها ومرتاحه إلا نحن

كسودانيين مجاملات زياده عن اللزوم

وأغلب الناس ما بعزرونا ليوم الإجازه

أحسن انو الواحد يبعد ويرتاح وضحوا

بالرفاهيه ومدارس جيمس العالميه ووووو


في النهايه يا مهند المفروض الناس تقلل

من المجاملات لانها مرهقه للطرفين و نغير

ونحاول ونحاول وأكيد حا ننجح

[مني]

مهند دوماَ تاتي لينا بالجديد والمواضيع المهمه واحيك علي هذا الجهد ..انا معك بأن المجاملات مهمه والا لن تجد احد يقف معاك ..وانت بتكون لاحظت الحته دي في مناسبة اخواتك ..يعني لومامشيت وجاملت وزرت وواجبت ماف حد بجيك او يشتغل معاك او يسأل فيك ...يعني انت لو رتبت زمنك كويس جداً بتقدر تعمل اي شئ ..إيناس انا بختلف معاك في راي .واي زول رايو براو ..وعندو نظره معينة..لكن انتي لو قلتي تمشي وقت المناسبة فقط او وقت الحاجه ...الناس ح تعمل نفس فكرتك دي يعني يوم يكون عندك حاجه بالبسو نضااااااااف وبجو يقعدو ولا في زول بسالك انتي عندك شنو عشان بقولو انتي مامحتاجه حد يعمل معاك شئ..لكن اهم شئ انك تزور قبل المناسبة يعني لازم تمشي تشوف الناس عندهم شنو وتشتغل معاهم ..لانو بجد بكونو محتاجين زول يشتغل معاهم ..ويساعدهم وحتي لو ماعندهم شئ يعني كان مشيت ساي مشيتك بتفرحهم وبتكون عليهم بالدنيا ...وانا عن نفسي بجامل اي زول كان من الاهل ولا كان من الاصحاب ولا الجيران لانو بجد وقت الحوجه انا بلقاهم جنبي وبساعدوني وبعملو لي اي شئ أديكم مثال (عندي عرس اخوي والله كنت مسافرة واختي براها في البيت بس ضربت لي صحباتي اتنين وحده من الجزيرة والتانيه في الخرطوم ..بس قلت ليهم اختي براها وانتو امشو ليها لانو انا لسه ماجيت ..والله جو ولقيتهم عملو اي شئ معاها ...وكانو معي في البيت قاعدين ...ويوم العرس زميلاتي في الجامعه كلهم كانو موجودين وماسكين الشغل كلو من نضافة الي الغداء لي الشاي وبعد العرس لمو معي الحجات يلا مشو ...يعني لو ماكنت مشيت ليهم وجاملتهم ماف زول كان حيجي يشتغل لي..وحتي الاهل والجيران مابقصرو )..
لكن من المهم الزول يجامل ..ويزور ويشارك عشان تلقا الناس في الصغيرة والكبيره كلهم يكونو معاك ...
غايتو يا إيناس كان جيتي السودان ومامشيتي وجاملتي ماف زول بجيك..
و يامهند خليك زي ماأنت ...وماتتغير ..ورتب زمنك ..بتقرا الانجليزي وبتعمل الزمالة وبتمشي شغلك بس خليك مجامل ...

وتقبل مروري

[enas]

بسم الله الرحمن الرحيم


تحياتي ليك أخت منى أنا عندي تعقيب

بسيط بس نحن اصلا بنتعب عشان الناس

الجونا ديل لو ما جونا ما بكون في تعب

اصلاً صدقيني الواحد بيتعب عشان الناس

الجو يخدموهوا ديل فهمتي وصلتك المعلومه

أتمنى ذلك...........

أما بخصوص مهند والله العظيم يا منى والله

إلاء مهند ده يكون طرزان أو الرجل

الخارق كيف بالله يرتب زمنوا ويمشي شغلوا

ويعمل الزماله ويدرس أيلتس أو سيبا

مع كل المجاملات دي صدقيني نحن هنا على

الاقل وسيلة المواصلات بتكون متوفره

دااااائما ومواعيد الزيارات مبرمجه

بزمن معين وبرضوا في تعطيل للمصالح فما


بالك بالسودان المناسبات مرات

بتكون عايزه سفر بعيد لازم يا منى

نفكر ونتكلم بمنطقيه أكتر وده الواقع

حقيقتا يا منى المجاملات فيها إعاقه

للحياة

[مني]

إيناس اي زول زي ماقلت ليك عندو فهم معين او راي هو شايفو براو الداير يجامل ويصل الناس بعمل العليو وبصلهم ولو في اخر الدنيا واي زول بعمل الربنا قدرو عليو..ومنو القال انو هنا وسيلة المواصلات مامتوفر وما افتكر انو المواصلات هي البتوقف الزول عن المجاملة ..
يعني في الاخر اي زول برايو والهو شايفو صاح ..يعني ماف حد بجبرك ..ويقول ليك غسباً عنك انك لازم تجي ..وتجاملني ..ومهند ده ماضروري يكون طرزان ...لو يوم واحد في الاسبوع او الشهر مشا عمل الواجب العليو مابكون قصر حتي ولو مشا بعد الحاجه خلصت المهم وصلهم ..
وفي الاخر اي زول يعمل البريحو ..او القدر عليو
وده راي انا يعني مابغير من حد او بقول لي زول اعمل كدا

خارج النص: يامهند مجاملتك دي بقت زي مشكلة دارفور وهسه بنشوف ليك في حل

[وسام]

الى كل اموجودين هنا.
بصراحة ح ناخد وندى فى الموضوع ولن يحدث تغيير...اظن يا مهند حملة التغيير ربما تكون الاجيال القادمة.. لكن جيلنا الحالى سار على ما كان عوّدهُ ابوهُ....المهم انت مشكووور اديتنا فرصة نفضفض ونعكس الواقع...والغريبة الكل بيتفق على كدة بس الاشكال انو زى ماقالت منى لما تحصل المناسبة نفس الناس الاتفقو انو فى افراط فى المجاملة هم الذين سينصبون لك اللوم على التأخير...او عدم المشاركة وهنا تكمن المجاملة..
( بين قوسين ) . ما ملاحظ لى اليومين دى بخش بالليل بس .. مجاملات وكدة.وتبقى هذه الصفة ميذة حلوة للسودانيين وان صعبت فى غالب الاحيان.

[كريك ديفيد]

بين لنا الرسول حق المسلم على المسلم فقال: ((حق المسلم على المسلم رد السلام وعيادة المريض واتباع الجنائز وإجابة الدعوة وتشميت العاطس)).

أما فضل زيارة المريض فهي كثيرة ونذكر منها :
1. إن زائر المريض يحظى ويتمتع بثمار الجنة حتى يرجع من زيارته قال الرسول : ((إن المسلم لم يزل فى خرفة الجنة حتى يرجع قيل: يا رسول الله وما خرفة الجنة؟ قال: جناها)).
2. أما البشرى الثانية التي يزفها لنا رسول الله يقول عليه السلام :((ما من مسلم يعود مسلما غدوة إلا صلى عليه سبعون ألف ملك حتى يمسي، وإن عاده عشية إلا صلى عليه سبعون ألف حتى يصبح وكان له خريف فى الجنة))
السلام عليكم
كلنا والحمد لله من امه محمد رسول الله صلي الله عليه وسلم
انا ما عراف الناس او الواحد منا لمن اطلع بره السودان بشوف انو عاداتنا وتقالدنا تخلف للاسف
والحمد لله انو عاداتنا وتقاليدنا شي بميزنا نحن السودانين من اي شعب اخر مثل العمامه والتوب
وانا ما عارف هل المجاملات دي كلو يوم يعني كلو يوم في مريض وفي عزاء وفي عرس؟؟؟؟
امكن في السنه تجامل 30 مره بتاثر شنو في عملك ولا دراستك؟؟؟؟؟؟؟؟؟
ياخوانا النسأ لقديمو ضله
ومن المستحيل واحد اكون عندو عرس وما اعزم الناس الا اكون زول بخيل وما اجتماعي
وانا اسأل اي حد فيكم لو كان عندو عرس ولا عزاء لا قدر الله او مرض لا قدر الله ما بتحب انو الناس تجيكم
ومدام انا عامل عزومه فمن الطبيعي عامل اكل وشرب وليمه يعني ومحتاج انو حد أضيفو لي المعازيم ولا شنو
ولو ما المجاملات كان ممكن تخسر ليك عمال عشان اضيف ليك معازيمك طيب لو انا انسان علي قدري حالي ما اعزم الناس يعني؟؟؟؟؟؟؟؟

وزي ما قالت مني
يعني لو ما صاحبات مني جو وجاملوها كان اختها حتعمل شنو؟؟؟؟؟؟؟؟
ويامهند اي حد لو اصر علي انو يعمل شي بعملو وما أظن المجاملات الفي السنه مابتفوت عدد الاصابع بتقيف في دراستك وعملك وتقويه اللغه
وبرضو جزاك عند الله خير لانك كثير المجاملات ودا ما كلامي دا كلام الرسول صلي الله عليه وسلم
في زياره المريض وصله الغرابه وان تكون في عون اخيك
والحمد لله انو الشعب السوداني اكثر شعب محب لرسول الله صلي الله عليه وسلم وبتبع سنه صلي الله عليه وسلم
تحياتي لجميع ســـــــــوداني وافتخر بتقاليدي وعاداتي والحمد لله اني من الشعب السوداني

[enas]

[فقط الأعضاء المسجلين والمفعلين يمكنهم رؤية الوصلات]اقتباس[فقط الأعضاء المسجلين والمفعلين يمكنهم رؤية الوصلات]المشاركة الأصلية كتبت بواسطة كريك ديفيد[فقط الأعضاء المسجلين والمفعلين يمكنهم رؤية الوصلات]بين لنا الرسول حق المسلم على المسلم فقال: ((حق المسلم على المسلم رد السلام وعيادة المريض واتباع الجنائز وإجابة الدعوة وتشميت العاطس)).


عليك أفضل الصلاة والسلام يا حبيبي يا محمد صلى الله عليهِ وسلم




أما فضل زيارة المريض فهي كثيرة ونذكر منها :
1. إن زائر المريض يحظى ويتمتع بثمار الجنة حتى يرجع من زيارته قال الرسول : ((إن المسلم لم يزل فى خرفة الجنة حتى يرجع قيل: يا رسول الله وما خرفة الجنة؟ قال: جناها)).
2. أما البشرى الثانية التي يزفها لنا رسول الله يقول عليه السلام :((ما من مسلم يعود مسلما غدوة إلا صلى عليه سبعون ألف ملك حتى يمسي، وإن عاده عشية إلا صلى عليه سبعون ألف حتى يصبح وكان له خريف فى الجنة))
السلام عليكم
كلنا والحمد لله من امه محمد رسول الله صلي الله عليه وسلم
يعني نحن يهود يا كريك استغفر الله العظيم بس
انا ما عراف الناس او الواحد منا لمن اطلع بره السودان بشوف انو عاداتنا وتقالدنا تخلف للأسف
منو الجاب سيرت الكلام ده هنا أصلا... منو القال تخلف أنا قلته المجاملات الزايده إنت قريت الكلمه دي وفاهمه كويس الزايده عن الحد فيها إعاقه للحياة وعندي مليون دليل
والحمد لله انو عاداتنا وتقاليدنا شي بميزنا نحن السودانين من اي شعب اخر مثل العمامه والتوب
لا حول الله يا كريك الجاب سيرت اللبس منو؟؟؟؟؟؟؟؟؟
وانا ما عارف هل المجاملات دي كلو يوم يعني كلو يوم في مريض وفي عزاء وفي عرس؟؟؟؟
امكن في السنه تجامل 30 مره بس في السنه ولا في اليوم قصدك بتاثر شنو في عملك ولا دراستك؟؟؟؟؟؟؟؟؟
ياخوانا النسأ لقديمو ضله بس الحمد لله انك إنت فاكر القديم حتى صورة التعريف بتاعتك خاتي لينا صورة عبد العزيز داوود ولا ده منو كرومه ولا الكاشف على قول يونس شلبي إمشي إمشي بس إمشي يااااخي
ومن المستحيل واحد اكون عندو عرس وما اعزم الناس الا اكون زول بخيل بخييييل عدييييييل كده وما اجتماعي
وانا اسأل اي حد فيكم لو كان عندو عرس ولا عزاء لا قدر الله او مرض لا قدر الله ما بتحب انو الناس تجيكم نحن قلنا ما يجو يا كريك الله يسامك بس قلنا يجوا يوم الدعوه مش قبل العرس بإسبوع ويمشوا بعد العرس بإسبوعين :pinch:
ومدام انا عامل عزومه فمن الطبيعي عامل اكل وشرب وليمه يعني أكيد حا تعمل وليمه يعني حا تطبق ايديك وتتفرج :b18: ومحتاج انو حد أضيفو لي المعازيم ولا شنو
ولو ما المجاملات كان ممكن تخسر ليك عمال عشان اضيف ليك معازيمك طيب لو انا انسان علي قدري حالي ما اعزم الناس يعني ياااااااااااااااخي استغفر الله إنت عامل وليمه وعلى قدر حالك؟؟؟؟؟؟؟؟

وزي ما قالت مني
يعني لو ما صاحبات مني جو وجاملوها كان اختها حتعمل شنو؟؟؟؟؟؟؟؟
ويامهند اي حد لو اصر علي انو يعمل شي بعملو وما أظن المجاملات الفي السنه مابتفوت عدد الاصابع شنووووو عدد الأصابع :kabong:بتقيف في دراستك وعملك وتقويه اللغه
وبرضو جزاك عند الله خير لانك كثير المجاملات ودا ما كلامي دا كلام الرسول صلي الله عليه وسلم
في زياره المريض وصله القرابه وان تكون في عون اخيك


أنا من هنا حا ارد عليك أخ كريك طبعاً

يا أخ كريك نحن ما قلنا ما تزور

المريض ولا تتبع الجنائز لا أبدا نحن قلنا

الممارسات في عاداتنا الزائده عن حدها

نقلله بقدر الإمكان رأفةً بالفاعل

والمفعول لأجلهِ لأنو يا أخ كريك المجاملات

الزائدة عن الحد انتبه كويس أنا قلته

الزائده عن الحد بتعيق الحياه وكلامي

ما من فراغ من تجارب بتحدُث حولنا

وبالمناسبه أنا ما منقطعه عن

السودان .... وبتكلم ليك بكل ثقه

لأني سودانيه وشايفه الحاصل بالعكس أخ

كريك لو الغربه أثرت فيني ماكنته

كتبته اى مداخله في هذا البوست إنت

كتبته عن أجر زيارة المريض ونسيت أن

تكتب عن آداب زيارة المريض وآداب

المشاركه في المناسبات الرسول عليه

الصلاة والسلام وضع لكل قانون في

حياتنا آداب من يحبهُ يجب عليهِ إتباعها

نحن يا كرك أكثر شعب متبع لرسول الله

بدليل إختلاطنا في الحفلات وبدليل لبس

التوب الذي يسترنا من ساسنا لراسنا

وبدليل إختلاطنا في كل مكان والأدله

كتيره نحن الان ليسُ بصددها اذاً نحن اكثر

شعب محب لرسول الله ملتزم ومتبع لسنتهِ

يا كريك والدليل الأكبر إننا عملنا

قناه تعزف وتغني وتمدح في رسول الله ليل

ونهار مع العلم إنو المعازف

حرام .......لسه عندي كلام كثير يا أخ

كريك لكن لا أريد أن انحاز عن الموضوع

المطرح فالأخ مهند يستطيع أن يجامل

ولكن في أوقات إجازتهِ دون أن يرهق

نفسه وكان الله في عونهِ وعون الجميع


والحمد لله انو الشعب السوداني اكثر أكثر؟؟؟ شعب محب لرسول الله صلي الله عليه وسلم وبتبع سنه صلي الله عليه وسلم
تحياتي للجميع ســـــــــوداني وافتخر بتقاليدي وعاداتي والحمد لله اني من الشعب السوداني
الحمد لله

اذا سمح لي صاحب البوست لي عوده أخرى للإيضاح أكثر مع ضرب الأمثله

[فقط الأعضاء المسجلين والمفعلين يمكنهم رؤية الوصلات]

[اوسلو]

السلام عليكم ورحمة الله

شكراً يا أخ مهند على الموضوع المميز للنقاش

وصراحة كدا الموضوع مهم جداً

وأنا رأيي تقريباً من رأي الأخت إيناس

صراحة الشعب السوداني مجاما زيادة عن اللزوم

وفعلاً المجاملات الكتيرة بتاخد من وقت الإنسان

أيوة نحن شعب حنين جداً وبنحب بعضنا شديد

بس برضو كل شئ فات حده إتقلب ضده

الناس تجامل بس في حدود المعقول

والمفروض الناس تتغير

يعني القعدة أسبوعين في بيت العرس أو العزاء ماصح

وبرضو الزيارة عندها آداب من مواعيد واستئذان

عشان الناس ترتب زمنها

والأخ مهند ماقادر يعمل الزمالة والإنجليزي عشان المجاملات زايدة حبتين

أنا شخصياً عن نفسي بجامل بس مافي أي حاجة ولا أي وقت

لأنو جد عندي طموحات كتيرة في حياتي عاوزة أحققها

يعني مثلاً أنا شغالة كل يوم بمشي الشغل من الساعة 7

والدوام بخلص 4

عندي كورس إنجليزي بعد الدوام وبرجع بيتنا 7

يعني معقولة بعد دا بقدر أرجع البيت وأجامل إلا يكون عزاء

عشان تاني بكرة أمشي الشغل من الصباح

حتى لو جاملت إلا أمشي ساعة المناسبة

لأنو قبل المناسبة مستحيييييييييييل

فعشان كدا المفروض الناس تلتفت شوية في موضوع المجاملات

عشان مهند يقدر يكمل دراسته وطموحاته

وأي واحد يقدر يعمل الحاجات الفي باله

تحياتي

[كريك ديفيد]

ياستاذه انا قلتا كلنا يعني جمعتا ما خصصتا
ايوه وانا مصر علي انو لو ما الاغتراب ما كان الواحد اتغيرت نظرتو عن المجتمع السوداني اللهو اتربي فيو دا لو كان اتربي فيهو اصلا
وانا متظر المليون دليل
انتي لو فهتي قصدي كويس ما كان قلتي كده لاني ما قصدي اللبس يا استاذه
انا قلت انو عاداتنا وتقاليدنا مميزه السودانين مثل التوب للمراه السودانيه والعمه للرجل فهمتي قصدي
في السنه30 مش في اليوم وين الناس البتجامل في اليوم 30 مره معناتو 90%من الشعب السوداني يوميا يا ميتين ولا مرضانين ولا معرسين هههههههه!!!!!!!!!!!!!
امشي وين انتي طارداني من المنتدي ولا شنو الله اسامحك
بس العبره ما انو اخت صوره فلان ولا علان الفي القلب في القلب انا والحمد لله ما من الناس البتغيرو مع البئه الانا فيها
ايوه بخيل انتي تفسيرك شنو يا استاذه لو عندكم عرسو او اي مناسبه وما تعزمي الناس نسميو شنو
اجو يوم الدعوه كيف يعني طيب البجهز الاكل منو ولا البركب الصيوان منو البجير البيت منو ولا الببني منو ولا ولا ولا
دا كلو علي ناس البيت وبعد الوليمه البعيد الترتيبات منو من عده واحتياجات كتيره ولا الظاهر عليك انتي ما حصل جاملتي عشان كده وبعدين البجو قبل العرس بسبوع وبمشو باسبوع يا بت خالتك يا بت عمك يعني من ناس البيت !!!!!!!!!!!
طيب انا مدام عامل وليمه مين البساعدني في الوليمه دي اجيب ناس كزام بشي الفلاني ولا اي ناس مناسبات:lulu120:

عندي كم سوأل ممكن
انتي مؤلوده وين
وكم سنه قعتي في السودان
وكيف زيارتك للسودان كل سنه ولا كل قرن
هل انتي سودانيه الام والاب
بس انشاء الله تفهميني لاني كتبت بعاميه السودانيه

[enas]

[فقط الأعضاء المسجلين والمفعلين يمكنهم رؤية الوصلات]اقتباس[فقط الأعضاء المسجلين والمفعلين يمكنهم رؤية الوصلات]المشاركة الأصلية كتبت بواسطة كريك ديفيد[فقط الأعضاء المسجلين والمفعلين يمكنهم رؤية الوصلات]ياستاذه انا قلتا كلنا يعني جمعتا ما خصصتا


ايوه وانا مصر علي انو لو ما الاغتراب ما كان الواحد اتغيرت نظرتو عن المجتمع السوداني اللهو اتربي فيو دا لو كان اتربي فيهو اصلا
وانا متظر المليون دليل
انتي لو فهتي قصدي كويس ما كان قلتي كده لاني ما قصدي اللبس يا استاذه
انا قلت انو عاداتنا وتقاليدنا مميزه السودانين مثل التوب للمراه السودانيه والعمه للرجل فهمتي قصدي
في السنه30 مش في اليوم وين الناس البتجامل في اليوم 30 مره معناتو 90%من الشعب السوداني يوميا يا ميتين ولا مرضانين ولا معرسين هههههههه!!!!!!!!!!!!!
امشي وين انتي طارداني من المنتدي ولا شنو الله اسامحك
بس العبره ما انو اخت صوره فلان ولا علان الفي القلب في القلب انا والحمد لله ما من الناس البتغيرو مع البئه الانا فيها
ايوه بخيل انتي تفسيرك شنو يا استاذه لو عندكم عرسو او اي مناسبه وما تعزمي الناس نسميو شنو
اجو يوم الدعوه كيف يعني طيب البجهز الاكل منو ولا البركب الصيوان منو البجير البيت منو ولا الببني منو ولا ولا ولا
دا كلو علي ناس البيت وبعد الوليمه البعيد الترتيبات منو من عده واحتياجات كتيره ولا الظاهر عليك انتي ما حصل جاملتي عشان كده وبعدين البجو قبل العرس بسبوع وبمشو باسبوع يا بت خالتك يا بت عمك يعني من ناس البيت !!!!!!!!!!!
طيب انا مدام عامل وليمه مين البساعدني في الوليمه دي اجيب ناس كزام بشي الفلاني ولا اي ناس مناسبات:lulu120:


بدوووون تعليق

لمن تقراء كتابك يا موسى


عندي كم سوأل ممكن ؟

انتي مؤلوده وين؟


وكم سنه قعتي في السودان؟



وكيف زيارتك للسودان كل سنه ولا كل قرن؟



هل انتي سودانيه الام والاب؟




بس انشاء الله تفهميني لاني كتبت بالعاميه السودانيه؟




كريك كفايه لحدي هنا اوكى وبشكر الاُخت أوسلوا[فقط الأعضاء المسجلين والمفعلين يمكنهم رؤية الوصلات] على تفهمه للمكتوب وحبها للتطور وربي يوفقك وينجحك يارب.... ويرد غربتك يا أخ كريك
[فقط الأعضاء المسجلين والمفعلين يمكنهم رؤية الوصلات]

[مني]

ياجماعة اي زول في الاخر بإقتناعو والداير يعملو عشان الكلام مايجيب كلام انت تقول رائك والشئ المقتنع بيو وشايفو صاح..يعني تجامل ماتجامل ماف زول بكسر رقبتك..والداير يكون في العصر الجديد يكون معاو وانو شايف المجاملات مضيعة للوقت ...لكن بجي اليوم والبتعرف فيو قيمة الناس الخايف انك تضيع فيهم زمنك وبتعرفهم وما يمشي لي زول والداير يكون في العادات القديمة بكون احلا زول ..واناشايفه ياأيناس واوسلو ياانتو مامريتو بتجربة شغل وتعب في مناسباتكم ..او لسه ماجاتكم مناسبات في بيوتكم ..بس في الاخر اده رائكم انتو والشايفنو صاح؟؟؟
ياإيناس خلي بالك طوييييييييييييييييييييييييل في النقاش ..وردك خفيف علي كريك ديفيد

[وسام]

مهند .. عساك طيب..يبدو انو شغلتك المناسبات عن البوست. اعلم اخى انّ من البيان لسحراً.. واقدر انك تجيد استخدام اللفظ بكل سلاسة ويسر وصولاً للمطلوب فى اقلّ مدة. تجدنى اختزن فى داخلى الكثير لما دار من اختلاف فى وجهات النظر بين اخوينا كريك وايناس ونحن نقدّر رأى كل واحد .. بل نسعد بأن يعتّد الانسان برأيه ولولا الرأى لما كان الرأى الاخر....ولكن اتمنى منك لم اطراف الموضوع عسى ان نفوّت الفرصة على الشيطان ان يتسلل من باب اختلافنا وهو خبيث ذكى....ولنعلم جميعاً ان اختلاف الرأى لايفسد للود قضية. (( وتزعلى يوم وأزعل وننفعل مرات...مرات تقبّلى منى واتوسد ضراعى سكات...وفينا حنينة نتشابك مودة تشابك الغابات...ونحنا أذا اختلفنا سواء بنطيع الصاح..ولو بتنا القوى بنرتاح...أذا تمن الملح والعيش رضاء الشمات.))
اعتزر لكم جميعاً وربما كنت اكثر حساسية فى فهمى وربما لم يكن هنالك اصلاً اختلاف ...ولكنى أحسست انها الصورة الاكثر غرابة للاختلاف فى وجهات النظر....واتمنى ان اكون انا خطأ وانتم صواب.

[enas]

[فقط الأعضاء المسجلين والمفعلين يمكنهم رؤية الوصلات]اقتباس[فقط الأعضاء المسجلين والمفعلين يمكنهم رؤية الوصلات]المشاركة الأصلية كتبت بواسطة مني[فقط الأعضاء المسجلين والمفعلين يمكنهم رؤية الوصلات]يا جماعه إختلاف الرأى لا يفسد للود قضيه نتناقش نتحاور نتفاهم من أجل رفعة ورقي الوطن قلوبنا بيضاء متسامحه

ياجماعة اي زول في الاخر بإقتناعو والداير يعملوالله يفتح عليك طيب إنتي فاهمه كلامك الرائع ده يا ريت لو كريك كمان فهم معني كلامك ده عشان الكلام مايجيب كلام انت تقول رائك والشئ المقتنع بيو وشايفو صاح..يعني تجامل ماتجامل ماف زول بكسر رقبتك..والداير يكون في العصر الجديد يكون معاو وانو شايف المجاملات مضيعة للوقت ...لكن بجي اليوم والبتعرف فيو قيمة الناس الخايف انك تضيع فيهم زمنك وبتعرفهم وما يمشي لي زول والداير يكون في العادات القديمة بكون احلا زول الله يبدو إنك ما فهمتي وجهة نظرنا..واناشايفه ياأيناس واوسلو ياانتو مامريتو بتجربة شغل وتعب في مناسباتكم ..او لسه ماجاتكم مناسبات في بيوتكم ..بس في الاخر اده رائكم انتو والشايفنو صاح هههههه عارفه يا منى انتي بتكفتي وبترجعي تاني تطيبي بخاطرنا؟؟؟

ياإيناس خلي بالك طوييييييييييييييييييييييييل في النقاش ..وردك خفيف علي كريك ديفيد

بالمناسبه يا اُخت منى أنا ردي على كريك من باب الدعابه والفكاهه ليس إلاء وكريك ديفيد بعرف انا منو ولما رديت بالصوره دي عشان أكسر حدة الإنفعال ليس إلا إطمئني بس عندي وجهة نظر ليك ولكريك ولبعض الأخوان في المنتدى إنو لما ينطرح إى موضوع بيتكلم عن بعض السلبيات في بلدنا ما تاخدو الموضوع من زاويه واحده وتمسكوا فيها نحن بنحاول نحل بعض السلبيات وده منتدى سواني يعني منتدانا من حقنا إننا نعرض مشاكلنا ونحلها وده ما بقلل من وطنيتنا وحبنا للوطن ...أسئلة كريك فيها إنكار لأصلي لكن هذا الشىء لا يهمني كثيراً فأنا اعلم من اكون ومش زعلانه لانو نحن بنعرف بعض بل بالعكس جاوبته على الاسئله بروح النكته وأتمنى انك ترجعي تقري كلامي تاني انا ما قلته انو نحن ما نجامل نجامل لكن في حدود المعقووووول
وشكراً
[فقط الأعضاء المسجلين والمفعلين يمكنهم رؤية الوصلات]

[مني]

ياستي وجهة نظرك وصلت واتفهمت والحمدلله ..وفاهماك بتقولي في شنو ؟؟ وماافتكر فينا زول ..او احسن اتكلم عن نفسي براي .. وعارفه انا بقول في شنو يعني مامنتظراك تقولي لي الجملة دي ...ووجهة نظرك بالنسبة ليك صاح وانا ماعندي دخل بيك ولا عندي الحق اسالك ..اي موضوع بنتنقاش في وبندرسو بكل الجوانب يلا بنرد عليو ...يعني انا ماخده الجانب الانا شايفاو ممكن يتعمل يعني ماباخد الجانب الباثر في حياتي او بعطلني ده بعرفو انا براي ...(هههههه عارفه يا منى انتي بتكفتي وبترجعي تاني تطيبي بخاطرنا؟؟؟)والله مالي الحق اني اعمل كدا ماصاح خالص ..انا لا بلوم زول ولا برجع بطيب لي حد لانو ماشايفه شي ييطيبو عليو الخاطر .وانا تعليقي علي كلامك لي كريك حاجه وعلقت عليها وانتي ادري بنفسك والكلام البتقوليو..فعشان النقاش مايزيد والكلام يجر..انا في الاخر قلت كلامي ..

[كريك ديفيد]

ياجماعه اي حد حر في رايو
بس في ناس لو ما الناس اقتنعو برايو بشوفو الغير ما بتفهم دي براها مشكله عشان الزول احاورون لانو حتي لو اقتنع وما اظن اقتنع بشوفو كلامو هو الصاح
يعني فاقد لي روح الحوار ولا شنو .................
المنتدي الواحد بقول رايو وبحاور الغير في رايو مش تفرض علي الناس رايك
ومدام دا الاسلوب في الحوار عشان ما اجر الكلام وجيب كلام زي ماقالت مني
انا بكتفي بكده وكفايه
واي حد مقنتع برايو اعمل بيو
وانا بتاسف لو بدرت مني حاجه وجرحت عضؤ
واهديكم الابيات دي
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره 00 وسط الداره00
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا معايا زي ضلى
لو ما جيت من زي ديل..
كان أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟

[مهند اسيد]

بسم الله والحمد لله
انا عارف البت البلونة ايناس دى بس منتظرة الدبوسة , يا اخوانا اعذروها من دييييييييك وما لقت حاجة تنفسها , وانا فى نهاية مقالى قلت العايز يتنفس ويبكى زاتو يجى يبكى ههههههههه
نقدر لك اختى ايناس تفاعلك مع قضايا مجتمعك, لا يكون الانفعال اخوتى الا لشئ يهم الانسان, واختنا ايناس وكريك وكل المتداخلين من على البعد خارج البلاد نحييهم , فهم حسوا وما زالوا يحسوا بحسسنا وهذا ديدن غالبيةالسودانين فى حلهم وترحالهم .
انا آسف لعدم تداخلى معكم لمشغولياتى, طبعا نهاية يوم الخميس والجمعة والسبت ما حقتنا ولا حاجة, قال اجازة قال , الحمد لله على كل حال .
اشكر كل اللذين تفاعلوا مع الموضوع, قرات كل التداخلات من الصباح الباكر لكنى لم استطع الرد وما زال دوام العمل يمنعنى الاسهاب فى الحديث. لكن الاخوة قالوا وأفاضوا وكل عبر عن وجهة نظره بكل شفافية فمهما اختلفت الآراء هنا وهناك فكل منا وبلا شك مقصده هو حياة سودانية متحضرة واعية واعدة متوازنة , لم ألتمس اختلاف كبير بين آراء المتداخلين الا من بعض اللبس وهذا يعالج ويتضح بالأخذ والعطاء فى النقاش الجاد الهادف, لا باس اخوتى من بعض القفشات والمزح اللطيف,اثناء الحوار كى لا يتسلل الملل حتى عند مناقشة قضايانا وهمومنا, ولكن فى نهاية الامر لا بد لنا من ان نستفيد من هذا الحوار, ومن التجارب المطروحة.
لم ولن أنسى وقفة الاهل والجيران والاصدقاء معنا منذ اليوم الذى سبق الاحتفاء بزواج شقيقتى, وقفة تجعل الانسان يعاهد نفسه انه مهما كلف الأمر, من جهد وزمن ومال. لن تهاون ولن يتوانى فى رد هذا الجميل, فالناس بالناس والكل برب العالمين.
فى رأيى الاعتدال.وتنظيم الوقت, والصبر والمصابرة بالطبع هى ما تمكننا من التوفيق بين الأمرين, ودائما خير الأمور أوسطها, فالمبالغة فى الشئ تثبت عكسه كما تفضل الأعضاء.
أسوق تجربتين من الحياة السودانية:
أعمل فى شركة غالبية موظفيها من أهلنا المحس, علمت منهم ولأول مرة أسمع بهذا الشئ واعتبره دليل عافية ونموذج طيب أتمنى أن يعمم, علمت أن بعض العوائل عندما تحدث فيهم وفاة, يقام المأتم فى احدى الجمعيات الخيرية وهى جمعيات منشاة بعون ذاتى من العوائل, وذلك لعدة ساعات فقط وفى يوم واحد ومن ثم ينفضوا _يرفعوا الفراش_ ويذهب كل الى حال سبيله.
النموذج الثانى:
سمعت أن احدى قرى الجزيرة الخضراء, بدلا عن زيارة المريض فى المستشفى وضرب أكباد ابلهم وأكبادهم من وراءها, ويبطلوا أشغالهم, ويزحموا المريض ويقطعوا نفسوا ويتلوا يدوا بالسلام واحتمال المسكين يفتقوا ليهو العملية, ويتعبوا نفسياتوا, بدلا عن ذلك كله, قرر العقلاء والشباب المتعلم أن ينتظروا عودته من المستشفى. والأموال التى كانت ستصرف على المواصلات جيئة وذهاب تجمع فى شكل تبرعات ويستلمها أهل المريض, فهو أولى بها.
تقبلوا تحياتى وفائق احترامى

[مهند اسيد]

شباب والله كوننا نتحاور ونتناقش ويحمى وطيس النقاش, ده دليل عافية, ايوة ممكن فى لحظة نسئ فهم بعض لكن فى النهاية بيناتنا الاحترام قائم, طالما كلنا عارفين ومبدأنا كلنا اننا بنغير على مجتمعنا وبنتمنى ليهو كل تقدم وتحضر, شئ طبيعى أن يكون هنالك اختلاف فى الآراء والا لبارت السلع, فى هذا الموضوع ليس هنالك تنافر وتصادم آراء, فقط نحتاج وسطية وتقارب, فالشقة ليست بالبعيدة.

[saja]

يا مهند سخنتا الناس وهربت

موضوعك رائع جدا برجع تاني عشان هسه عندي منا سبه
ههههههههههه
كريك والله المناسبات بقت اكتر من الهم على القلب

[مهند اسيد]

ما عزمتينا لى سجا فى الحفرة أرمى فيها الفيلة
تحياتى سجا

[ابوالحروف]

السلام عليكم ورحمة الله تعالي وبركاتة
احبتي هذه اول مشاركة لي في هذا المنتدي العظيم واتمني من الله عز وجل ان يلهمنا افضل الحديث وأن يوفقنا في قول الحق
اولا
اشكر صاحب هذا الموضوع واحيه علي هذا النجاح في اختياره لهذا العنوان كما قالت اختي سابقا
حقيقة لا نستطيع ان نهرب منها ولا يشعر بألمها إلا من اعترضت مسار حياته

المجامله بشكل عام
هي شي جميل وعادة لايمكن ان يتخلي عنها المجتمع السوداني مهما تغير الحال
(لو ما بقينا من ناس ديله وآ اسفاي وازلي واهل الحاره ما اهلي)
ما اظن فيكم واحد مجامل اكتر مني
انا من اقصي الشرق إلي اقص الشمال ومن اي منطقة اعلم ان فيها احد اقاربي إلا كنت اشد اليه الرحال
لكن :
ما هو نوع المجامله وما مدي مكانتها في قلوب الاخرين
وما مدي ماكانت من هو صاحب لهذه المجاملة
انا لا اريد ان اتحيز لاحد منكم لكن اتكلم من واقع تجربة عاصرتها
كنت اجامل في ما هو معقول ومالم يكن يستحق السفر كنت اجامل عن طريق التلفون واعتزر لعدم مشاركتي له نسبتا لظروفي
وعندها اذا تقبل عزري اشكره واوعده بالمشاركة في مناسبات اخري
وهذا لا يمنعني من واصلت تعليمي

طيب كثير من الناس لا يقدرون ظروف الاخرين
بالرقم من ان المناسبة تكون ليس من المناسبات التي تتطلب المجئ اليها
ومن المفترض تقدير الظروف
بالنسبة للغربة فواقع العمل هو مايكون عايق في عدم المجامله لا يمكن ان اترك عملي الذي هاجرت من اجله لكي اشارك في طهور مثلا لو صح التعبير
فهذه من الاشئ التي يجب ان نراعي اليها جميعا

اخير اقولها لك انت

حاول ان تلتمس العزر لاخيك
ولكم مني كل الشكر والتقدير

[مهند اسيد]

ابو الحرووووووووووووووووووووف
أطول من المدة , أقوى من الشدة , أهدأ من السكون , أحد من السين ,أسرع من لمح العين
نورت منتداك أخى ابو الحروف ’ حللت اهلا ونزلت سهلا , أشكر لك مرورك الأنيق وأناملك السحرية وحروفك المعبرة.