الكمساري

[عصمت عبدالله]

يا اخوانا انا قالوا زول شطاح عشان كدا تاني حأعمل حسابي وما حأشطح كتير.. لكن دي اخر مرة اشطح فيها.. الليلة عندنا قصة الكمساري .. دا طبعا للناس الماعندهم عربات خاصة لانها دي مافيها كمساري زي الطيارة ما فيها بوري مع انو لسة ما ركبت طيارة الا طيارة رش وكانت خردة..وما اظن دا يحصل حتى الحج ذاتو ناوي امشي بالباخرة واجي بالمواصلات.. <?xml:namespace prefix = o ns = "urn:schemas-microsoft-com:office:office" /><o:p></o:p>
يا جماعة الكمساري دا شخصية غريبة قدر ما تقول ترفع من مكانتو تعمل ليهو اهمية وتحسسو انو مضيف او مرافق او اي صفة راقية .. تلقاهو ما بنفع.. انا متأكد في ناس حيتفلسفو لي ويقولو الكماسرة فيهم خريجين.. كلامكم صاح لكن لاحظت انو من عاشر قوما اربعين دقيقة صار مثلهم آآآي اربعين دقيقة ما اربعين يوم قاصد كدا لانو دا كان زمان الزمن دا ثانية واحدة بتقلبك زول تاني.. نرجع لموضوعنا الكمساري.. ياخي دا لما تديهو عشرة آلاف يعمل نايم بالباقي ولما تقول ليهو الباقي يقول ليك اصبر ما في فكة مع انو هو ما صبر ولم بعد شوية تعاين ليهو تلقاهو طلع الباقي من جيبو اصلو دا جيب وللا مصنع العملة؟<o:p></o:p>
في نوع لئيييييييييييييييييييم تلقى مقاعدو ما تنفع يشيلو فيها خضار وللا حيوانات.. وبعد دا لئيييييييييم... مقاعدنا دي لو ما عاجباك اعمل ليك عربية خاصة وللا ما تجي من بيتكم..انت الجابك شنو من اهلك... ولو ما طولت بالك بجيك ضغط عدييييييييل بسبب الكمساري <o:p></o:p>
في كماسرة غريبين وبصراحة مخهم تخيييييييييييييين لو اديتو حق راكب واحد يقول ليك كم نفر؟ وطبعا بكون جادي لو قلت ليهو اتنين يقول ليك التاني وينو.. انا مرة في واحد قال لي كم نفر قلت ليهو تلاتة انا وانت والسواق والباقي خلي معاك... طلع اغبى بني آدم الله خلقو قال لي ليه اصلو انت ما اديتني حق نفر واحد بس... الحافلة انفقعت بالضحك... انت ياااااااااااااا اللابس النضارات دا ألفت الجمبك..<o:p></o:p>
وفي واحدين ما بعرفو حاجة في الدنيا دي... يا استاذ صحي الشهر دا فيهو خمسة وعشرين يوم؟ يازوول القال ليك كدا منو؟ دا المعلم قال لي كدا لانو انا حاسوق العربية منو بعد يوم خمسة وعشرين وهو حيسافر اهلو عشان كدا ما اداني قروشي وقال لي تشيل حقك من الايام الجاية.. وبكل بساطة يقول ليك الشهر الجديد ببدا بعد يوم خمسة وعشرين بي اسبوع.<o:p></o:p>
بعدين المعركة المعروفة بين الكمساري والطالب طواااااااااااااالي مدورة والكمساري راكب راسو انو الطالب غلطان والطالب راكب راسو انو الكمساري غلطان.......... انا زمان في الجامعة مع انوكنت ساكن داخلية لكن بركب مواصلات عشان اشاكل الكمساري الليييييييييييم بس والطيب ما بسألو..<o:p></o:p>
ياخي قصة الكمساري والطالب دي براها دايرة ليها يوم.. الكمساري مشكلتو انو شايف الطالب دا حقار ومتكبر ورافع نخرتو لانو طالب وهو ما قرا عشان كدا لما الكمساري يمسك القروش وانت تقول ليهو طالب ما بصدق طوالي اول حاجة يحمر ليك تاني حاجة يقول ليك في خمسة قدامك.. ولما تعاين تلقى الحافلة قدام كلها عجائز...<o:p></o:p>
والله يا جماعة انا شايف زي الشطحت شوية لكن ما مشكلة ما بيناتنا شطحات وكدا وبعدين الحالة واحدة وللا شنو يا شمس...<o:p></o:p>
الكمساري دا قصصو كتيرة ومواقفو كتيرة ما بتكمل وانا متأكد كل واحد فيكم مر بيهو موقف مع العزيز الكمساري..<o:p></o:p>
واليومين ديل الكماسرة بقوا سياسيين واحد يكورك الشجرة العزوزاب واحد جنبو يكورك الشجرة بس..واحدين بعد ما يخلصو يعاين للزول البقرا في جريدة عليك الله اخبار الانتخابات شنو الهندي ما بفوز.... قوش فايز فايز... اسي في داعي الجماعة ديل ينسحبو ما كان يشاركو عشان يفوز شامبيون على البشير....<o:p></o:p>

[enas]

ورائعه اخرى من روائع كاتبنا المتألق عصمت عبد الله .......

اخي عصمت اشطح زى ما عايز بس المهم ما تحرمنا من

الدرر النفيسه دي

[عصمت عبدالله]

مشكورة يا راقية انت بالطريقة دي بتحرشي فيني وفي ناس كدا لما يحرشوهم خلاااااااااص جنهم بقوم ولما جنهم بقوم تاني ما بتمسكوا

[sunflower]

(لكن ما مشكلة ما بيناتنا شطحات وكدا وبعدين الحالة واحدة وللا شنو يا شمس...)

انت بتاع مشاكل كمان مش شطحات بس

لكن دي شطحة جميلة الكماسرة الله يعينم ومايوقعم يوم معااااااااااااااك

[عصمت عبدالله]

انتي كترتيها يا شمس بعد ما شطاح ونطاح ولحلاح ودحداح وفارس جحجاح كمان بقيت بتاع مشاكل...............
والله ما بزعل منك كفاية طلتك ومرورك.... بالجد مشكورة

[مهند اسيد]

بسم الله الرحمن الرحيم
احييك اخى عصمت عبدالله فشطحاتك تناقش قضايا مهمة فى قالب فكاهى مما يجعل القارئ يتابع كلامك الى نهاية البوست دون ان يتسلل الملل الى نفسه ولكن اخى فى قصتك هذه لاينكر احدا ما تقول ولكنك تحاملت على الكمسارى الذى هو فى الغالب غير متعلم ونسيت تلكم التصرفات من الركاب وهنا اعنى بالذات المتعلمين على وجه العموم والطلبة خصيصا فهم كما قلت ألد أعداء الكماسرة,فيفترض بالمتعلم ان يأخذ الكمسارى على قدر عقله ومعرفته وادراكه,كم شاهدت مواقف من طلبة ومعاملتهم للكماسرة بطريقة تسئ الى المتعلمين والعلم,المصيبة ان الناس يحكمون مسبقا على الكمسارى بانه سيئ الخلق وانه سارق وينسون انه بشر ينسى ويخطئ دون أن يتعمد.
احدى مواقفى مع الكماسرة: اخذ الكمسارى بجمع ثمن التذاكر (يطقطق) وقمت بدفع ما على,فاذا به يعيد على الكرة ليقبض ثمن التذكرة للمرة الثانية-هذه المواقف معهودة للجميع ويكون حظ الكمسارى من هذا الخطأ التقريع الشديد على احسن الفروض هذا ان لم يشتم ويهان(تانى ادفع ليك انت مجنون فى عقلك ولا شنو)-فما كان منى واظنكم لا تصدقونى هههههه الا انى وبكل تهذيب قلت له مبتسما انى قد دفعت ثمن التذكرة,لم يتعود الكمسارى المسكين على هذا الاسلوب واكاد اجزم انه لم يعامل بمثل هذه الطريقة منذ ان وطئت قدمه الحافلة,فاذا به يرمقنى بعين الريبة والشك بأننى مراوغ واريد الزوغان بثمن التذكرة,فلم يتردد فى ان يصر بأننى لم ادفع ثمن التذكرة,وبعد حجة مطولة وبدون ان يقتنع كف عن المطالبة بثمن التذكرة,كان بامكانى ان ادفع مرة ثانية لكى اتحاشى الجدال لولا اننى خفت ان ادفع مرتين ويوصمنى بالسارق الحرامى,ومن يدرى لربما كانت هذه نظرة الجميع الى فى تلك اللحظة, من هنا يتضح اننى اذا قمت بالتكشير فى وجهه وقلت وانا انتهره اننى دفعت لما حدث ما حدث, لم الوم الكمسارى على هذا الموقف بقدر ما لمت معاملة الناس للكمسارى وهذه نتيجة سوء معاملته,لا اخفى عليكم اننى منذ تلك اللحظة عزمت ان تكرر مثل هذا الموقف ان اكشر عن انيابى وابرز عيونى محدقا فى ام عينه على الأقل وانا اخبره بأننى قمت بدفع الثمن.
ختاما اوصيكم بالكمسارى اخوانى الأعزاء من يدرى لربما أجبرتنا الظروف على العمل بهذه المهنة الشريفة.

[عصمت عبدالله]

اخي مهند لك مني كل التقدير والثناء على مشاركتك بالراي وارفع قبعتي احتراما لك فانت انسان قلما تجود به ايامنا هذه فمن يتعامل بكل هذا الرقي وهذا الاسلوب مع شخص أجهل من (معزاية)



لكنك تحاملت على الكمسارى الذى هو فى الغالب غير متعلم ونسيت تلكم التصرفات من الركاب
نعم لا انكر انني تحاملت فربما خانني التعبير أو نسيت ذكر جملة عدا اقلة منهم.. نعم هناك اقلة منهم لا تذكر
ونفس قصتك هذه حدثت وكنت شاهدا عليها ولكن بصورة معكوسة
واحد من الركاب بعد استلم الباقي بتاعو تاني قال للكمساري جيب الباقي والكمساري المسكين بكل حسن نية اداهو الباقي انا طبعا غضبت شديد وقلت للزول رجع للكمساري الباقي بتاعو دا طبعا كان عذرو انو ناسي........ اتخيل قال ناسي مع انو حسب قروشو بيدو وراجعها واتأكد انها تامة


ختاما اوصيكم بالكمسارى اخوانى الأعزاء من يدرى لربما أجبرتنا الظروف على العمل بهذه المهنة الشريفة.

يا اخي العزيز انا اضم صوتي لصوتك ولكن ما كل الكماسرة لانو في واحديين........ اللهم طولك يا رووووووووووووح

[القلب الحنون]

الرايع عصمت سلامات
والله ابدعت وتالقت مزيد من الابداع والتالق
امنياتي لك بالتوفيق


[فقط الأعضاء المسجلين والمفعلين يمكنهم رؤية الوصلات]

[menna]

شطحة ذي الشطحة مشكوووووور

[عصمت عبدالله]

الرايع عصمت سلامات

والله ابدعت وتالقت مزيد من الابداع والتالق
امنياتي لك بالتوفيق



[فقط الأعضاء المسجلين والمفعلين يمكنهم رؤية الوصلات]


مشكور يا سيد الابداع والتألق
تحياتي ليك

[عصمت عبدالله]

شطحة ذي الشطحة مشكوووووور


شايف القصة عجبتك وللا واحد من الكماسرة نام بباقيك
ما تحرمينا من طلاتك اشكرك وربنا ما يوقعك في كمساري يفقع مرارتك

[مبرمج المستحيل]

انا افريقي انا كمساري


يا مان السودان كللللللو سواقين و كماسره يعنى نص شعبنا غبي ؟؟


تسلم والله موضوعك نااااااااااااااااااااااااايس

[عصمت عبدالله]

انا افريقي انا كمساري


يا مان السودان كللللللو سواقين و كماسره يعنى نص شعبنا غبي ؟؟


تسلم والله موضوعك نااااااااااااااااااااااااايس

مشكور انا ما دخلت السواقين انت براااااااااك دخلتهم وشيل شيلتك
وبعدين القال ليك منو السودان كلو سواقين وكماسرة يا خي ديل كلهم سبعتاشر ستة في جاكسون وسبعة في الاستاد واربعة في بحري و تلاتة في امدرمان وواحد جاري الشارع ديل ما سبعتاشر وللا انا غلطان في الحساب


تشكر يا كمساري هههههههههههههههههه

[mosabslb]

الاخ عصمت
السلام عليكم و رحمة الله و بركاته
اولا اسمح لي ان اشيد بمشاركاتك و اسلوبك الشيق الذي تتناول به مختلف القضايا و ان احييك و كل الاخوان و الاخوات و لمثلكم ظهر المرء الاحترام و التقدي
ثانيا انا شخصيا لي تجربه في مهنة الكمساري و قد ملت فيها فتره قاربت ال 5 شهور و قد تأكد لي ان هناك من يحتقر الكمساري و يري انه احقر مخلوقات الله بدون ان يعرف الظروف التي اجبرته على ان يعمل بهذه المهنة و لو تريث لشخص لعلم مدي فهم و درايه الكمساري من جهله و من الطرائف انه في مره من المرات كنت (اطقطق )لالم القروش من الركاب فاذا بفتاة تدعي انها طالبه مما دعاني لاطالبها بالبطاقه التي تثبت ذلك فاذا بها تثور و تملا الحافله صخبا و ضجة و تستنكر ذلك و تعلق بقولها (انت زاتك لو اديتك ليها ما حتعرف تقراها ليه اذيك ليها يا جاهل) مع العلم انه في هذه الفتره انا ادرس في الجامعة و في السنه الاخيره من كلية الهندسه و جميع تقديراتي كانت ممتاز و عملت بهذه المهنة لاجد ما يعينني على تكاليف طباعة مشروع التخرج و تبعاتة و تخرجت بعد ذلك و الحمد لله بامتياز و مرتية الشرف في الهندسه الكهربائيه و مع كل هذا لم ارد عليها ردا يماثل كلامها بل اكتفيت بالابتسام و طلبت منها اعطائي البطاقه فحاولت احراجي مع الركاب و اعطتني بطاقه معاهد التعليم البريطانيه لتعليم اللغة الانجليزيه و كانت البطاقة بالانجليزيه فاعدتها لها و اخبرتها انني لم اكن اساعد الخفير و املا معه الازيار في حصة الانجليزي و ان هذه بطاقة كورس انجليزي ليس الا ، المهم ما احاول ان اصل اليه انه بكل مجتمع من هو سيء الاخلاق و ضيقها و جاهل و من هو قد وصل الي درجة من العلم و العقل لا يمكن تجاهلها فاتمنا من جميع الناس ان تعرف مع من تتعامل اولا قبل ان تلفظ باقوال قد تسيء الى من تقال اليه .
و ختاما اعتذر لان ردي جاء متاخرا و لكنى لم اسجل الا قريبا في المنتدي الذي اتشرف ان اكون من اعضاءه و اتمني ان نضيف كل جديد للاعضاء الكرام كما اضافوا هم لنا .
و لكم التحية و الاحترام و التقدير:0122: