اين اماكن الترفيه والعلاج في ابوظبي؟

[saleem]

السلام عليكم ..
بسبب استغراقي في العمل افتقد الى كثير من المعلومات عن الامارات ولدي بعض الاستفسارات ان شاء الله واحد يساعدني فقد لاحظت ان بعض الاعضاء يمتلكون معلومات وافرة عن الامارات:
اولا اريد ان اعرف عن اماكن الترفيه وقضاء الوقت في ابوظبي سواء مفردا او مجموعة؟
ثانيا: عن العلاج في ابوظبي وهل افضل العيادات الخاصة ام المستشفيات ؟ وتكلفة العلاج؟
ولكم مني الشكر والتقدير

[enas]

بسم الله الرحمن الرحيم

للأسف اخي الكريم انا مقيمه في الإمارات ولكن اسكن في إمارة دبي اذا لديك اى استفسار عنها او عن امارة الشارقه فانا جاهزه..

[saleem]

شكرا لمرورك على الموضوع..
ممكن تعطينا بعض المعلومات عن اماكن يمكن زيارتها في دبي

[enas]

بسم الله الرحمن الرحيم
السلام عليكم أخ سالم تحياتي ليك اخي
اولاً إذا كان عندك سياره خاصه فبكون تمام واذا لا فما مشكله في دبي يوجد حل لاى مشكله مواصلات ممكن تأخد تكسي خاص فكل اصحاب التكاسي مؤهلين لمعاملة السياح ويحفظون المدينه عن ظهر غيب لانها مدينه سياحيه بالدرجه الأولى والتكاسي اخر موديلات امريكيه من فصيلة كابرس وكامري والجماعه ديل و مجهزه على اكمل وجه ومريحه جداً جداً داخل كل تاكسي بتلقى نشره بالأماكن السياحيه الموجوده.. والاسعار عاديه واذا ما عجبك التاكسي ممكن تأخد البص السياحي وفي منو نوعين السياحي العادي وفي سياحي مكشوف للهواء الطلق وده ما بتلقى فيهو غير الأجانب لانهم بحبو الشمس واذا كمان البص ما عجبك في المترو الرهييب وفي كل مكان عندو محطه ممكن يأخدك من اول دبي من ناحية الشارقه من عمارة الملا بلازا ويمشي بيك خط متواصل لحدي مول دبي تنزل وتدخل المول وهو اكبر مول في الشرق الأوسط وترجع تانى بدربك كل الناس البجو من ناحية الشارقه بعملو كده تفادياً للزحمه على فكره تذكرة المترو 5 درهم فقط للرحله ده بالنسبه للمواصلات وكمان ممكن تسأل إذا حار بيك الدليل لانو البلد ملانه سودانيين يعني ما حا تغلب نهاااائي تمام......
حا نبداء بالحدائق والمتنزهات الحدائق الحا اكتبه ليك دي غنيه عن التعريف جميله جمال مباااالغه تحس كأنك في اوربا خضره وتنسيق سبحان من أبدع
حديقه الجميرا بيش جميييييييييييييييله
حديقه الخور
حديقه الصفاء
حديقه الممزر دي ما بنصح انك تمشي ليها اما اذا اضطريت تمشي فأبعد عن البيتش لانو السياح ماخدين راحتهم خالص
حديقه وندر لاند
ويلد وادي مدينه مائيه على فكره ويلد وادي خصصت يوم للنساء اذا معاك الاهل وهى جميله جداً
حديقه الحيونات
وقريه التراث
المدن
مدينة جميرا ومركاتو اماكن جميله تستحق الزياره قمه قمه في الروعه


ثانياً : المراكب البحرية
سفينه البوم
وباص العجيب برمائي
سفينه دانه دبي
بالنسبه لسفينه دانه دبي هي عائمه في الماء وكذلك سفينه البوم عائمه في الماء
ثالثاً الأسواق
أو مراكز التسوق
مركاتو
سيتى سنتر
برجمان
الغرير
حمر عين
البستان
مدينة جميرا
مركز المنال ده فيهو تياب حرير رهييييييييييييييييييييبه زي تياب مزيعات النيل الأزرق واجمل بكتييييييير وبتكون نسخه اولى من سويسرا على طول على المنال مباشره بس املاء جيبك وامشي وخصوصاً إذا الأهل معاك على فكره مركز المنال ده في سوق نايف المشهور وحا تستمتع بسوق نايف فيهو اى حاجه تخطر على بالك
أما سوق مرشد فده فيهو كل انواع اواني المطبخ والفايبر قلاس يعني العده والطقوم والحاجات دي والملايات وهو سوق جمله بتلقى فيهو كترة نسوان سودانيات بياخدوا ملايات بشراهه مرات بتلقى كم محل كده ببيعوا بالفرده وما بتقيدو بالجمله لكن اذا كان معاك اسره ومامشيت بتكون ما شفته دبي... والله يعينكم من كتر السواح الأجانب لانو قصاد المرسى .....
الوافى
ابراج الامارات
السوقات
الواحة
المزايا
ابو الهيل دي كلها سناتر فخمه

ما تنسى لااازم تزور برج خليفه او اعلى برج في العالم وتشوف النافوره الراقصه وكمان في منطقة البرج دي وحواليهو في مولات رهيييبه وداخل المول ممكن اذا عايز تتسلى شويه في اسكتشن للتزلج يجنن بس اذا ما بتعرف للتزلج ما تخاطر لانو كل الموجودين داخل الاسكتشن عباقره وحا تضيع معاهم
مكان تاني لااااازم تزورو جزيرة النخله داخل الخليج رهيييييييييييبه وفي قمة النخله يوجد فندق اتلانتس الأعجوبه رووووووووعه لازم تدخل جوه فيهو مول يجنن وفي المدخل في حديقة سمك رهيييبه بتشوف السمك كأنو اعلى منك وحواليك وانواع نادره كمان من الأسماك ...........
المطاعم طبعاً في حالة انت لافي في السوق المطاعم كتييييييييييييييييره وفاخره والأسعار عاديه في مطعم سوداني حا اجيب ليك اسمو وعنوانو حالياً ما فاكرهو بقدم وجبات سودانيه ...
سألته من العلاج إذا انت مقيم او زائر ممكن لاى طارىء تمشي لاقرب حوادث في اقرب مستشفى وهم بقوموا باللازم ....
اذا عندك اى استفسار أنا جاهزه

في اماكن تانيه لااااااااازم تزوره باخد نفس وبرجع اكمل ليك سوق التنين / برج العرب / القريه العالميه

[saleem]

الاخت الكريمة ايناس لك كل الشكر والتقدير علي استجابتك لاسئلتي وعلى المعلومات الوفيرة والقيمة وعندما اجد فرصة لزيارة دبي سيكون ردك مرجع بالنسبة لي ..
بالنسبة لكلامك عن المواصلات والتاكسي طبعا انا زرت دبي مرة واحدة فقط لسبب معين وكانت تجربة مريرة مع المواصلات اولا طلبت من تاكسي اخذي الى مكان معين وقال انو بيعرفو لكنو دور بي نصف ساعة بدون فايدة وبعدها عانيت لاصل الى شارع الممزر وروقت بي جبنة حبشية والسودانيين في حالهم تجمع جنب ست الجبنة وتسكع وسمسرة.
اما بصات دبي الله لايحوجني ليها متاهات ومصاعب.. وطبعا مافي مقارنة بين ابوظبي ودبي في التكاسي والمواصلات ابوظبي هادئة ومنظمة اكتر واسعار المواصلات فيها اقل بكتير من دبي مافي بطاقة يومية بي اتنين درهم وبعدين ما عارف رحلة قصيرة ورحلة طويلة.. هنا بدرهم واحد تجوب ابوظبي وما في تحديد حد ادني للدفع في التاكسي ..
وطبعا زيارة ليوم واحد لا يمكن ان احكم بها ولكن هذا رايي في المواصلات فقط والحمد لله ما اظن احتاج للمواصلات تاني وان شاء الله اجد فرصة قريبة لزيارة دبي واستكشافها وكما قلت سيكون معلوماتك مرجع بالنسبة لي وفي انتظار المزيد.
مشكوورة مرة اخرى .. وتقبلي تحياتي
سليم

[enas]

بالنسبة لكلامك عن المواصلات والتاكسي طبعا انا زرت دبي مرة واحدة فقط لسبب معين وكانت تجربة مريرة مع المواصلات اولا طلبت من تاكسي اخذي الى مكان معين وقال انو بيعرفو لكنو دور بي نصف ساعة بدون فايدة الله يكون في العون يمكن تكون بتتكلم عن التاكسي التابع لشركة دبي للمواصلات أعتقد ذلك مرات الشوفير بكون تعيين جديد لكن الرحله بتكون محسوبه بالعداد عموماً أنا كان كلامي عن التاكسي الخاص اذا حبيت ممكن انزل ليك ارقام تلفونات للتاكسي الخاص.... لكن الحمد شكلك اخدت الليسن ومافي حوجة للمواصلات ولا يهمك ولا تزعل اعتبره مكسب انك شفته المدينه وبعدها عانيت لاصل الى شارع الممزر ده لانك ما بتعرف المدينة وروقت بي جبنة حبشية والسودانيين في حالهم تجمع جنب ست الجبنة وتسكع وسمسرة. عموماً أنا ما بعرف القهاوي دي وين بالضبط باين عليك انك شربته القهوه دي في ديره دبي لانها ملانه سواح ومزعجه جداً نصيحه ابداء زيارتك ببر دبي وانا متأكده انك حا تستمتع جداً على فكره الإنسان بطبعو ولوف جداً أنا كمان لما امشي ابوظبي ونادر جداً اني أمشي بكون متضايقه جداً وما برتاح إلاء لما ارجع لدبي

تخريمة
علييييك الله يا سليم شوف نحن متفسحين كيف في البلد دي نغالط ونحاجج التقول بلدنا يلا عموماً هى بلدنا التاني

[القلم الجرئ]

مركز المنال ده فيهو تياب حرير رهييييييييييييييييييييبه زي تياب مزيعات النيل الأزرق واجمل بكتييييييير وبتكون نسخه اولى من سويسرا على طول على المنال مباشره بس املاء جيبك وامشي



ههههههههههههههههههههههههههههههههههههههه الله يجازي محنك ياايناس قطعتي مصاريني بالضحك في الاقتباس اعلاه هههههههههههههههههههه استغفر الله العظيم
والله احييييييييك على السياحه القضيناها معاك من داخل هذا البوست الذي يحكي عن روعة وجمال وسحر امارة دبي
بالجد معلومات مفيدة للعايز يزور تلك الامارة
وانا شخصياً استفدت كتييييير من هذه المعلومات
وحفظتها في جهازي لاني عندي زيارة الى دبي بخصوص العمل في بداية شهر 10 القادم باذن الله
وياسليم اتمنى انك تكون استفدت من البوست ده وتحياتي ليك ياغالي
وشكراً مره تانية ايناس

[saleem]

تخريمة
علييييك الله يا سليم شوف نحن متفسحين كيف في البلد دي نغالط ونحاجج التقول بلدنا يلا عموماً هى بلدنا التاني
بالمعلومات الشفتها عندك اظن دة بلدك الاول ... اجدد الشكر وفي انتظار المزيد

وياسليم اتمنى انك تكون استفدت من البوست ده وتحياتي ليك ياغالي
طبعا استفدت كتيير وفي انتظار ناس ابوظبي

[ودالمرضى]

اينلس انت كنت شغاله فى وكاله سفر وسياحه ولا سائقه بص سياحى
على العموم معلوماتك رائعه وجميله رغم اننى اعرفها جميعا
وزرت جزء كبير منها ولكن طريقه سردك لها اعاده الى ذهنى اعادتها مره اخرى
ولك تقديرى واحترامى